إزاي ترضيلي حبيبتي
أتمعشق إسمك وانتى عماله تزيدي في حيرتي
وما انتيش حاسه بطيبتى إزاي !
مش لاقي في عشقك دافع
ولا صدق في حبك شافع
إزاي أنا رافع راسك وانتي بتحني في راسي إزاي!
أنا أقدم شارع فيكي
وآمالك م اللي باليكي
أنا طفل اتعلق بيكي في نص السكه وتوهتيه
أنا لو عاشقك متخير
كان قلبى زمانه اتغير
وحياتك لفضل أغير فيكي لحد ما ترضى عليه
وإزاي ترضيلي حبيبتي
إزاي سيبانى ف ضعفى
طب ليه مش واقفه ف صفى
وانا عشت حياتى بحالها
عشان مالمحش ف عينك خوف
وف بحرك ولا ف برك
إزاى احميلك ظهرك
وانا ضهرى ف اخر الليل
دايما بيبات محني ومكشوف

المصدر : http://100fm6.com/vb/showthread.php?t=242979 - 100fm6.com

نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نستحلفك ....... نسترحمك
نستعطفك .......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
اسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد "غازه" لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد "مستوطنة "
متسلطنة بالسرطنة
إيه اللي خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
بخيار ..حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم
يحيا الزعيم

الرائع احمد فؤاد نجم