بقالكم فتره مرتاحين من وجع الدماغ والصداع والانقلاب اللى بيحصل فى البلوج بسبب التاجات

فجبت لكم تاج على الماشى كده واهو يكون نوع من الترويح عن النفس بدل الكأبه اللى غرقان فيها بلوجر واهله من فتره

نبدأ بسم الله ونقووووول أكشن

اسمك واسم مدونتك؟

دودو عاشقه الرومانسيه - مدونه نبضات قلب ولهان

احب الالوان؟ الايام؟ الارقام؟

الازرق بدرجاته – الجمعه علشان اجازه – الارقام الزوجيه

برجك وتاريخ ميلادك؟

القوس – 14 ديسمبر

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : هسيبها لكم انتم تحكموا فيها

العيوب: عصبيه جدااااا – متقلبه جداااااااا – عنيده جدا جداااااااا – ردود افعالى سريعه جدااااا

الصبر

ماهو مكانك المفضل؟

- البحر طبعاااااااااا

ايه هى هوايتك المفضله؟

كتابه الشعر والقراءه بس ده كان زمان (:

ما المقوله اللى تؤمن بها؟

لا تحسبن سرورا دائما ابدا **فمن سره زمن سائته ازمان

اجمل هديه قدمت لك من مين؟

مصحف من مُدرستى عبير عمر وعبله مجوهرات شيك جدا وعروسه من فاتيما

اسعد يوم فى حياتك؟ واتعس يوم فى حياتك؟

كل يوم عشته مع بابا واتكلمت معاه فيه كان يوم سعيد

اتعس يوم كان وفاه بابا

موقف طريف لا ينسى من ذاكرتك؟

ابقوا اسئلوا حنين القلب (موقف الصلصه) ده اللى انا فاكراه

معاك ثلاث وردات لمين تهديهم ؟

ليه الاحراج ده بقىىىىىى؟؟؟؟؟؟؟؟

واحده للمدونيين وواحده لاصحابى المقربين وواحده لزوج المستقبل بس يارب يكون يستاهل

معاك ثلاث رصاصات على من تطلقهم؟

واحده على اليهود وواحده على اى حد بيجرح فى اى حد وواحده على اى حد يضايقنى انا شخصيا

ايه رايك فى الحب؟ ولمن تقول اجمل كلمه حب؟

الحب شئ لا ارادى – لبابا الله يرحمه لانه الوحيد اللى يستحقها

هل من السهل ان تمثل الحب لشخص يحبك لعدم جرح مشاعره؟

ممكن لكن الصعوبه فى الاستمرار ووقتها هيكون الجرح اشد

المراه فى نظر الرجل .......... أكمل ؟

الدنيا بجمالها وزينتها

الرجل فى نظر المراه.............أكمل؟

النصف الثانى لي راى تانى بس اخاف الرجاله يموتونى

ماهو اسعد خبر سمعته هذا العام؟ وماهو اتعس خبر؟

اسعد خبر :- كان حمل حنين القلب – اتعس خبر :- يووووووه دول كتير قوى ومش عايزه افتكرهم بصراحه

لمن تهدى التاج؟

حنين القلب (المدونه اتهجرت وبتشتكى من العونكوبوت) طبعااااااا اجبارى

فاتيما روح قلب ماما وروح قلبى انا شخصيا

ستيته اللى عارفه كل حاجه

وردشان روح الحب الصادق

شيما المشكومه من الحكومه

عيلاء الشاعر الحزين ايوه هو عيلاء مش مكتوبه غلط ولا حاجه

صبرنى يارب اهو بجملة الرغى ياصبصب

كيارا اللى هتطنش كالعاده ماانا عارفاكى (:

عادل اخويا علشان اشوف خفه دمه فى الردود بقى لانها وحشتنى جدا

سووووول

كرملله شاب فقرى

ايناس الاحزان يارب تعشق افراحها بقى

حاجات جوايا لانها بقت بتكتب قليل قوووى

واى حد يعجبه التاج فالدعوه عااااااااااااااااامه

السؤال ده جانى من اختى ساره وخالتى حبيبتى ستيته

ودول بالذات مقدرش اقول لهم لأ

اذكر عشره اشياء صادقه فى حياتك؟
صريحه جدا حد التجريح وده بيزعل ناس كتير منى وماما بتقول عليا بلسانين واللى ربنا يحبه ما يقولش قدامى كلمه ماتعجبنيش علشان هيلاقى طلقات نار طالعه فى وشه وهاكسفه ولو هو مين ومش هيهمنى

احيانا باتحمل بطريقه تخلينى استغرب نفسى وده بيكون مع اللى بحبهم بس لانى بطبعى عصبيه مووووت
باخد حقى مش بحب اسكت عنه لانى كتير اتقال عليا عبيطه فبحاول اغير الفكره دى حتى بينى وبين نفسى

انانيه فى حبى لابعد درجه وباغير موووووووووووووت وحبى حب امتلاك ده اعتراف

بانسى الاساءه وقلبى ابيض بس مش بحب حد يكذب عليا
واضحه حد الهبل فى حين انى بلاقى غموض معايا من اقرب اصحابى وده بيوجعنى قوى
باخاف على اصحابى واللى اعتبره صديق يبقى له حق اخوة الدم واكتر
لو حد جرح حد من اهلى بكون زى الوحش معاه والمقصود باهلى هنا بابا الله يرحمه - احمد - ماما
مش صعب ان حد يدخل قلبى وانا قلبى كبييييير ويساع من الحبايب كتييير

ملوله قوى.. بازهق بسرعه.. مفيش حال بيريحنى وباحب اقعد لوحدى فترات طويله

لازم اهدى السؤال ده لحد
مين ميييين ؟؟؟؟؟؟؟؟ ماشى نقول
فاتيما لو وقت شغلها يسمح و انا عازراها لو مش جاوبته
وحنين القلب بس ياريت مش تطنش
والواد عادل بتاع السيما يارب اكون سبب انه يكتب فى مدونته المهجوره دى وينزل بوست
سالى حاجات جوايا لانى بقيت باشوفها نادرا
واى بونى ادم يلاقى عنده قدره على حل البتاع ده يتفضل يحله يعنى الدعوه عااااامه

مع السلامو عليكو

التاج ده جانى من اتنين احبابى

حبيبتى شيمو القمر اعترافات قلب

انا مش قلت ماتكرريهاش يابنتى؟

هو كل ما يجيلك تاج تبعتهويلى؟

و حبيبتى انوسه
واحب استغل الموقف واقولها عوووودى ياااانوووسه
دودو تناااااديكى
لازم تسمعى الكلام وترجعى للتدوين علشان اجيب لك حاجات حلوه
هتروحى فين يابنتى هو انتى ليكى غيرنا
ثم انى هاسمع كلامك اهو واجاوب التاج
يبقى انتى كمان تسمعى كلامى ومش تبعدى عننا

استعنا ع الشقا بالله

أذكر خمس أحلام على الاقل ..تخص ماضيك وتحلم فيها بتغيير اشياء .. ماذا ستعدل وماذا ستترك؟
لو الايام ترجع تانى هاحلم بالاتى
1- اكمل دراستى
2- مش هافارق حد من اصحابى
3- مش هابكى ولا لحظه على اى شئ مش مهم لانى اكتشفت ان العمر قصير قووووووووى
4- هاعيش مع بابا اطول وقت ممكن وكنت لا هاروح مدرسه ولا شغل ولا اى مكان هو مش فيه
5- كنت هاحقق حلم بابا انى اكون دكتوره رغم انى باترعب من منظر الدم وكنت وانا صغيره باساومه انى اكون دكتوره اطفال



أذكر خمس أحلام على الأقل ..تخص مستقبلك ؟
1- احب واتحب واعيش مشاعر جميله من غير الم
2- اكون زوجه صالحه وادخل الجنه برضا زوجى
3- اكون ام (نفسى بس لما يجى ابوهم الاول)
4- اشوفك اولاد حماده وادلعهم احلى دلع
5- اربى اولادى احسن تربيه واعلمهم احسن تعليم

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ....
واحده من المدونين من فضل ربنا عليا انى عرفتها
وواحد تانى مش هاقولكم عليه دلوقتى بسببه حاجات كتير جوايا اتغيرت

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا .. ؟
فى حياتى انا يبقى الرسول علشان نفسى بجد اشوفه وكتير كنت باحلم انى كنت اتولد فى عصره
فى حياه اولادى اكيد بابا لانهم كانوا هيتعلموا منه اللى انا اتعلمته واكتر وهيتدلعوا اضعاف اضعاف دلعى

تحدث عن ستة أسرار قد لا يكتشفها من يقابلك للمرة الأولى ؟
ولو ان السؤال ده مر عليا فى تاج قبل كده بس مااااشى نقول كمان
التواضع

العصبيه الشديده جدااا
جدعه قوى مع اصحابى
عنيده جدااااااا
دمى خفيف الحمد لله
قلبى ابيض جداااا ومتسامحه
مش باقدر اسكت على وضع غلط
سبعه اهو مش سته بس يلااااا

تهدي التاج دا لمييييييييين؟
حنين القلب بالزوق بالعافيه بميه النار هتجوبيه ياحنون

سووول بمناسبه التكليف تحلمى بايه؟

صبرنى هانم يارب حماتى حياتى علشان تجوزينى الواد

محاسن صابر لو تحب لانها هاجره المدونه اصلا

ضد التيار اجبار برضه ولو معترضه لينا ايميل نتكلم عليه

كيارا وبلاش تطنشى هه

اميره ملكه بحجابى دى هديه التعارف عن قرب علشان تحرمى تسمعى كلام سالى و تتكلمى مع حد

يلا كفايا غلاسه كده النهارده

انا جيييييييييييييييت
مش قلت لكم انى مجنونه وممكن ارجع بسرعه
مودى تمام التمام
ليه؟
ده سؤال وجيه جداااااااااا
ايمان صاحبتى من ايام الحضانه ياجماعه بتتجوز اه والله
اعرفها من 25سنه مؤبد يعنى (كتير مش كده؟)
اهى هتطلع حسن سير وسلوك وتفارقنى واخلص منها بقى
عقبالى انا كمان

ودى صوره تورته الفرح واللى هيجى جنبها هاقطعه

وطبعا انا صوتى رايح من اللى عملته النهارده

هو انا كل يوم هاجوزها دى حبيبتى عقبال شيكو يااارب

دى التالته بتاعتنا من الحضانه برضه

(حاجه تزهق العيال دى عايشين من زمان قوى)

مبروووووك ياايمى
واحب اقولكم ان كوز المحبه اتخرم طرطش على كمى
كل البنات اتجوزت وانا قاعده جنب امى
(تهييييس عاااادى جداااا)
والبت الشقيه شيمو القمر بعتت لى تاج
اصل انا ناقصه
عموما هانجوبوه ياشااااابه

من ايد مانمسكهاش

وياريت متكرريهاش

(:

من أنت ؟ وما الذى تفعله هنا ؟
انا بنوته اسكندرانيه مصريه باعشق بلدى واصحابى واتمنى اعيش فى سلام
باعمل ايه هنا بفضفض مع ناس حبونى لله وفى الله واستحملونى كتييييييير
إسرائيل تقصف كل جنوب ممكن بحثا عنك ، أى شمال ستقصد؟ .
هاروح الجنوب برضه
لان الاسرائيلى جبان ماشفتهوش وهو فى ايده بندقيه وخايف من حجر
لو قلت له بخ هيموت من الخضه
(دى عيال فرافير )
أنت مكلف بحذف حرف من حروف اللغة العربية .. أيها ستختار ولماذا ؟
اممممممممممم
مشكله السؤال ده
ماانا لو حذفت اى حرف هابقى لدغه
خليهم هما 28 هنعملهم احنا 27 لييييييييييه؟
لو قدر لك أن تدخل السجن فما هي القضية التي تتمنى ان تدخل بها إليه؟
دفاع عن الشرف لانى دمى حامى قووووى
بالمناسبة.. منذ متى اكتشفت نفسك؟
والله هى لسه فى مرحله الاكتشاف
واحيانا كتير باقف امامها مذهوله
على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟
الى حلمى طبعا .. علشان ده حلمى انا واللى نعرفه احسن من اللى مانعرفوش
نحن لا نعيش حياتنا بل نتعلم فيها كيف نعيش ما تعليقك؟
تعلمت أنه في المدرسة نتعلم الدروس ثم نواجه الإمتحانات ، أما في الحياة فإننا نواجه الإمتحانات وبعدها نتعلم الدروس
بجملة واحدة فقط أكتب تعريفاً لكل كلمة من الكلمات التالية:

الوطن
مصر ام الدنيا رغم انف كل الدنيا
الأم
الحنان والطيبه
الليل
الهدوء والسكينه والرومانسيه
الحب
هو الحياه من غيره هنعيش فى غابه
أمريكا
بعوضه واحنا عملناها شبح
المرأة
كل شئ مفيش حاجه لها طعم من غير حواء
الصمت
بيكون ابلغ من الكلام فى اوقات كتيره
الانترنت
سلاح ذو حدين
أخترمنصباً واتخذ قرارا ؟
رئيسه جمهوريه
القرار انى اتقى الله واحاول اكون ولو فى نص عدل عُمر
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
وهل وجود الضوء تغييب للشمس
بالعكس ده ابراز لدورها
لولا وجودها ماكان عنتر وقيس وجميل نطقوا الشعر
أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
لا جريمه ايه؟
مااكونش مطلوبه خالص افضل
هو العمر بعزقه؟
إلى أين تمضي كلمات الحب .. بعد أن نقولها؟
الى قلوب وعقول من نحبهم
هل تجد علاقة بشكل أو بآخر بين المرأة وقطاع الطرق ؟
قاطع الطريق يصُر على اخذ مالك او عمرك والمرأه تصُر على اخذ الاتنين معا

(انا ماقلتش حاجه هسسسسسس)
هذا فراق بيني وبينك .. متى ولمن تقولها ؟
لما اكتشف انى اتخدعت
لمن لاى حد بيكذب عليا لانى باكرهه الكذب والكذابين
كيف هو غداً ؟
فى علم الله
واتمنى يكون افضل من النهارده
امرر التاج الى
سالى حاجات جوايا
ايسافو
ايوشه
احساس طفله محبه للرومانسيه
لجين ابو الدهب بنت منطقتى
مونى الشريف
واى حد من دول مر عليه التاج ده قبل كده يبقى ربنا رحمه من ايدى

واللى يحب ياخده معنديش مانع

ناس غاويه وجع قلب اعمل ايه

اييييه الرغى ده كله صداااع انا عارفه

بس مدونتى بقى وانا حره فيها

واللى يحبنا مايضربش نار

ولو ان التاج ده لف على امه لا اله الا الله

ولو انى كنت مجهزه بوست نكد من النوع المفتخر

الا انى هاجاوب على التاج لانه هديه من اعز الاحباب ستوته

واغلى الاصحاب احساس طفله

ومش خساره فى طيبه قلبهم هما بس يقشروا وانا آكل

هنبدأ بسم الله ونجاوب

اسمك؟

عاشقه الرومانسيه (بحب الاسم ده قوى)

المشهوره بيه وسط اصحابك؟

دودو (كدابه طبعا)

سنك؟

26سنه (عايشه بقالى كتير)

مجال دراستك؟

تجاره (بدعاء الوالدين ده كان رأى بابا الله يرحمه ههههه)

اسم مدونتك؟

نبضات قلب ولهان (والنبى حلو الاسم)

صورتك الرمزيه فى المدونه بتعبر عن ايه؟
البراءه اللى انعدمت من كل شئ الا الاطفال



هل فكرت فى اغلاق مدونتك؟ والسبب؟
اه للاسف رغم انها لسه نونو عمرها 3 شهور بس
السبب كل الناس عارفاه وبلاش نكد بقى




ايه رد فعلك لو حد قل ادبه عليك فى تعليق؟
هو ده مش هايحصل بإذن الله لانى باعامل الناس زى مااحب انهم يعاملونى
بس لو ده حصل هاحذفه





اسوء مدونه ؟
مدونه تييييييييييت ... دخلتها غلط اتكعبلت فيها وانا باتمشى فى بلوجر
ولعنت تيييييت اللى خلاهم يدونوا






هايحصل ايه للايميلات بعد ما تموت؟
هاتتقفل ومحدش هايفتحها وتتملا حشرات زاحفه وعونكوبوت



اديت الباسوورد لحد قبل كده؟
لا .. بس ممكن احطه فى الوصيه حتى الورثه يبقوا يدخلوا ينضفوها من وقت للتانى


السفر بالنسبه لك؟
كان متعه واصبح حلم




المود بتاعك ايه؟

مجنونه وبحالات حتى اسئلوا ستيته




بتعمل ايه فى وقت فراغك؟
انا باشتغل أو بأدون
هيجى منين وقت الفراغ بقى؟



الاكله المفضله؟
سلطة البنجر- الباباغنوج - جميع انواع سلطات




الصفات اللى اخدتها عن والدك؟
كتيييييييييير
الصراحه الزايده - العصبيه - الطيبه - حب الناس - الاسراف - العقليه والتفكير




الصفات اللى اخدتها من والدتك؟
روحوا اسئلوا ماما




اكتر 6 حاجات بتكرههم؟
الكذب - البخل - النفاق - الخيانه - معرفه المصالح (حد يعرفنى علشان مصلحته) - مخالفه الوعد



اكتر 6 حاجات بتحبهم؟
عكس ال 6 حاجات اللى بكرههم


شخصيتك نوعها ايه؟
عصبيه ومتقلبه بس باروق بسرعه الحمد لله






لماذا دخلت التدوين من الاساس؟
والله مااعرف بس كل شئ ربنا جعله بقدر
يمكن علشان يكون لى نصيب اعرف ناس كويسين زيكم يدخلوا الفرحه على قلبى




اجمل كلمه قيلت فى وصف مدونتك؟
كتيييييييير كل الناس اللى بتدخل هنا زوق زوق صراحه




اهميه التعليقات بالنسبه لك ايه؟
زى اهميه البحر بالنسبه للاسكندريه




احلى بوست كتبته؟وضع اللينك ثم اذكر السبب؟

حكايه غرامى
لانى من يوم ما عملت المدونه وانا نفسى اكتبه
وطلع بشكل حلو انا راضيه عنه الحمد لله




افضل مدونه قرأتها؟
كل مدونه باحط تعليق على بوست لها بتكون افضل مدونه
لكن لو حددنا اكتر يبقى هاقول فاتيما وستيته




افضل بوست قرأته؟
بوست للرائعه ايوشه البوست ده خلانى بكيت من كتر الضحك
وبوست لحبيبتى فاتيما البوست ده خلانى بكيت بانهيار
(اصلى انا نكد مبسوطه باعيط زعلانه باعيط)

الشغل بالنسبه لك؟
زى الجواز شر لابد منه ( :



الانترنت بالنسبه لك؟
اهم من الهوا (ادمان بعيد عنكم)





تمرر التاج لمين؟

يووووووووووه خد عندك


كيارا لان لها فى ذمتى تاج

الواد عادل اللى عفريت ادهم صبرى لبسه
فاتيما لو تحب واتمنى انها تحب طبعا

محاسن صابر وده اجبارى ( :
عاشقه وغلبانه والنبى
اعترافات قلب كرسى الاعتراف بتاعى
حرررررف
سووووووووول
ايوشه
خالد همس الاحباب
همس المتغاظه اند مفروسه
ساره
شمس النهار
واى حد يعجبه التاج يتفضله
معلش بقى طولت عليكم بس التاج هو اللى طويل اعمل ايه؟




.