قلبى كتبت عليه ممنوع فيه الدخول

ومن النهارده خلاص بابه صبح مقفول

وجعى خلاص هانساه ولا هابكى تانى واقول

لا فى سهر من تانى ولا فيه عذاب هيطول

لا حبيب يجرح فيه ولا كلمه يوم تأذيه

ولا قلب يوم وياه وتانى يوم مشغول

قلبى اللى حب الحياه علشان حبيبه معاه

لويوم حبيبه نداه كان يستجيب على طول

قلبى اللى كان وياه .. كان زى طير فى سماه

لو يوم يقول الأه ... يلقى حياته فداه

لا سابه يوم لجراح ولا كان فى يوم مشغول

قلبى اللى كان صافى وحضنه كان دافى

ولحبه كان وافى .. اصبح ضعيف مكسور

قلبى اللى ياما داب مابين جراح وعذاب

وخيانه م الاحباب .. ممنوع فيه الدخول

زى النهارده من سنه

كنا بنرسم حلمنا

ونعد دقات قلبنا

ضحكتنا طالعه تهزنا

كنا نسابق ضلنا

كان كل رمل فى بحرنا

شايف حكايه حبنا

كل موجه ف شطنا

كانت تغنى لحننا

ده حتى كانت شمسنا

دايما رحيمه زينا

دى كل كلمه مننا

كانت سحابه تظلنا

وقمرنا لو غاب عننا

يبعت نجوم تنزل لنا

تسئل عليك وعليا انا

وتقول كان في حبيبين هنا

زى النهارده من سنه