ولو ان التاج ده لف على امه لا اله الا الله

ولو انى كنت مجهزه بوست نكد من النوع المفتخر

الا انى هاجاوب على التاج لانه هديه من اعز الاحباب ستوته

واغلى الاصحاب احساس طفله

ومش خساره فى طيبه قلبهم هما بس يقشروا وانا آكل

هنبدأ بسم الله ونجاوب

اسمك؟

عاشقه الرومانسيه (بحب الاسم ده قوى)

المشهوره بيه وسط اصحابك؟

دودو (كدابه طبعا)

سنك؟

26سنه (عايشه بقالى كتير)

مجال دراستك؟

تجاره (بدعاء الوالدين ده كان رأى بابا الله يرحمه ههههه)

اسم مدونتك؟

نبضات قلب ولهان (والنبى حلو الاسم)

صورتك الرمزيه فى المدونه بتعبر عن ايه؟
البراءه اللى انعدمت من كل شئ الا الاطفال



هل فكرت فى اغلاق مدونتك؟ والسبب؟
اه للاسف رغم انها لسه نونو عمرها 3 شهور بس
السبب كل الناس عارفاه وبلاش نكد بقى




ايه رد فعلك لو حد قل ادبه عليك فى تعليق؟
هو ده مش هايحصل بإذن الله لانى باعامل الناس زى مااحب انهم يعاملونى
بس لو ده حصل هاحذفه





اسوء مدونه ؟
مدونه تييييييييييت ... دخلتها غلط اتكعبلت فيها وانا باتمشى فى بلوجر
ولعنت تيييييت اللى خلاهم يدونوا






هايحصل ايه للايميلات بعد ما تموت؟
هاتتقفل ومحدش هايفتحها وتتملا حشرات زاحفه وعونكوبوت



اديت الباسوورد لحد قبل كده؟
لا .. بس ممكن احطه فى الوصيه حتى الورثه يبقوا يدخلوا ينضفوها من وقت للتانى


السفر بالنسبه لك؟
كان متعه واصبح حلم




المود بتاعك ايه؟

مجنونه وبحالات حتى اسئلوا ستيته




بتعمل ايه فى وقت فراغك؟
انا باشتغل أو بأدون
هيجى منين وقت الفراغ بقى؟



الاكله المفضله؟
سلطة البنجر- الباباغنوج - جميع انواع سلطات




الصفات اللى اخدتها عن والدك؟
كتيييييييييير
الصراحه الزايده - العصبيه - الطيبه - حب الناس - الاسراف - العقليه والتفكير




الصفات اللى اخدتها من والدتك؟
روحوا اسئلوا ماما




اكتر 6 حاجات بتكرههم؟
الكذب - البخل - النفاق - الخيانه - معرفه المصالح (حد يعرفنى علشان مصلحته) - مخالفه الوعد



اكتر 6 حاجات بتحبهم؟
عكس ال 6 حاجات اللى بكرههم


شخصيتك نوعها ايه؟
عصبيه ومتقلبه بس باروق بسرعه الحمد لله






لماذا دخلت التدوين من الاساس؟
والله مااعرف بس كل شئ ربنا جعله بقدر
يمكن علشان يكون لى نصيب اعرف ناس كويسين زيكم يدخلوا الفرحه على قلبى




اجمل كلمه قيلت فى وصف مدونتك؟
كتيييييييير كل الناس اللى بتدخل هنا زوق زوق صراحه




اهميه التعليقات بالنسبه لك ايه؟
زى اهميه البحر بالنسبه للاسكندريه




احلى بوست كتبته؟وضع اللينك ثم اذكر السبب؟

حكايه غرامى
لانى من يوم ما عملت المدونه وانا نفسى اكتبه
وطلع بشكل حلو انا راضيه عنه الحمد لله




افضل مدونه قرأتها؟
كل مدونه باحط تعليق على بوست لها بتكون افضل مدونه
لكن لو حددنا اكتر يبقى هاقول فاتيما وستيته




افضل بوست قرأته؟
بوست للرائعه ايوشه البوست ده خلانى بكيت من كتر الضحك
وبوست لحبيبتى فاتيما البوست ده خلانى بكيت بانهيار
(اصلى انا نكد مبسوطه باعيط زعلانه باعيط)

الشغل بالنسبه لك؟
زى الجواز شر لابد منه ( :



الانترنت بالنسبه لك؟
اهم من الهوا (ادمان بعيد عنكم)





تمرر التاج لمين؟

يووووووووووه خد عندك


كيارا لان لها فى ذمتى تاج

الواد عادل اللى عفريت ادهم صبرى لبسه
فاتيما لو تحب واتمنى انها تحب طبعا

محاسن صابر وده اجبارى ( :
عاشقه وغلبانه والنبى
اعترافات قلب كرسى الاعتراف بتاعى
حرررررف
سووووووووول
ايوشه
خالد همس الاحباب
همس المتغاظه اند مفروسه
ساره
شمس النهار
واى حد يعجبه التاج يتفضله
معلش بقى طولت عليكم بس التاج هو اللى طويل اعمل ايه؟




.

لا تعود
حبيبى .. انسانى
اقولها بكل كيانى
فلقد كان هواك مع دمى مولود
وسمعت منك الكثير من الوعود
فهل تذكر كل ماكان من العهود؟
والان سحابه حزن فوقنا تسود
وشبح الفراق الينا يعود
فلم يعد لهذا الحب فى قلبى وجود
اتظن انه سيكتب له الخلود؟
بعدما قاسيت منك كل هذا الجحود
وانا التى عاهدت قلبك على الصمود
وحلمت بانى اعبر بحبك كل الحدود
والان ارجوك.. الى حياتى لا تعود.. لا تعود

النهارده كان لقاء المدونين السكندريين ياجماعه
اليوم بجد كان تحفه
يمكن ده اكتر يوم اقدر احسبه من ايامى السعيده
بجد انا فرحااااااانه جدااااااااا
والناس اللى قابلتهم النهارده قمه فى كل حاجه
قمه فى الاخلاق .. قمه فى الافكار.. قمه فى الاحساس
قابلت فى اللقاء فاتيما روح قلبى طبعا واللى وصفتها لى
محاسن صابر بانها ملاك ولو ان الكلمه فعلا قليله عليها
واول ما شفتها اختها بالحضن جاااااااامد جدا
وبعدها اكلت ودنها طول النهار
هههههههههههههههههههه
اعمل ايه بس بحبها
وكمان قابلت هنوده اللى هاتسافر وهتوحشنا موت
واللى باشكرها انها كانت سبب فى اللقاء الجميل ده
وكمان لماضه اللى طلعت حاجه تانيه خالص غير ما كنت متوقعه
انسانه رقيقه ومتواضعه وعسوله وهاديه عكس المدونه خالص
بجد سكررر
وكمان حروف اللى ربنا كرمها وبقت كلمات صديقتى اللى هى خساره فيا اشاسا
وشيمو القمر اعترافات قلب كرسى الاعتراف بتاعى اللى قدامها باقر واعترف بكل شئ
و احمد اسير الجراح الاسكندرانى المشاكس جداا طول الوقت حاططنى فى دماغه ياجماعه
عااااااااااااا
اه يا غلبانه يادودو
وهشام جعلونى مريضا نفسيا اللى اتشرفت جدا بمعرفته هو شخصيه محترمه جدااااا
والشاب خالد همس الاحباب اخف دم مش من عائله الضاحكون لازم يكون شربات
و حنين القلب اللى زعلت جدا انى مالحقتش اقعد معاها كتير للاسف
و حنان الشافعى رياح الحنين واللى اسئذنت بدرى برضه

و نبض اسكندريه بنت عسوله فعلا

وزمرده اللى جت لنا على الاخر ولحقتنا فى اخر نص ساعه
اتقابلنا فى نادى الاطباء واللى عمرى ما هنساه لانى كنت من ضحاياه النهارده
):
اه والله ياعينى عليكى يادودوضحيه من يومك
هاقولكم ضحيه ليه بقى
بس اللى هيضحك عليا هو حر

الاول العقد بتاعى انقطع وانفرط على الارض
فيها حاجه دى؟
عاااااااادى.. فدايا ..المهم انى بخير

اقل من ثوانى وجه الجرسون بالقهوه المستكوف بتاعة فاتيما ووقف جنبى حول بعيد عنكم
هو انا اللى طلبتها؟ وصب القهوه فى الكوبايه و بووووووووووم
الكوبايه فرقعت والقهوه وقعت عليا .. البدى كان ابيض والله.. اصبح بنى
عااااااااااااا
انتم بتضحكوا
ماااااااااااشى
بعد كده رحنا على القلعه واكلنا ايس كريم

وقربنا قوى من الموج وكل ما تيجى موجه افط
من مكانى وهما يضحكوا عليا
ما انا اصلى اتعقدت
يعنى مش كفايه ماشيه بكمى مبقع كمان اروح مبلوله؟
والله انا مستهدفه النهارده واليوم ده حد كان باصص لى فيه
بس برضه مبسوطه جداااااااااااااااااااا
ومعنوياتى فى السما الحمد لله
كان نفسى ستيته وكيارا يكونوا موجودين
وبعد ما ودعت فاتيما وهشام وخالد
اتمشيت مع حروف شويه بس جاتنى حاله غريبه كده حتى حروف لاحظتها

هاقولكم هى حاله اسبهلال مصاحبه بحالة عته مؤقت وسرحان فظيع

شبه الواد ده بالضبط

يمكن لانى كنت منتظره اليوم ده واهو جه وخلص كمان
يمكن لانى مش مصدقه اصلا انه حصل لحد دلوقتى
يمكن لانى كنت فرحانه قوى وزعلت لما ودعت الناس الحلوه دى كلها
كل شئ جايز
المهم انى مبسوطه جداااااااا
وعلشان اليوم يكمل وتعرفوا انى مستهدفه بجد اول ما رجعت البيت لقيت النت فاصل
عاااااااااااااااااااااااااا
بس اهو عاد من تانى
عودا احمد مين احمد ده؟
ما علينا المهم اللى ما جاش اللقاء ده فاته نص عمره بجد مش هزار
وبالمناسبه دى احب اهديلكم اغنيه عبدالحليم واللى انا مش فاكره اسمها
واللى بيقول فيها يااصحابى يااهلى وياجيرانى انا عايز اخدكم ف احضانى
مش قادر على فرحه قلبى مش قادر ابدا ياحبايبى
كملوها انتم بقى هو انا هافضل اغنى كده كتير ولا ايه
عارفه ان صوتى حلو بس معلش بقى
احم احم

يااااااااااااارب يسعد قلبك ياهنوده انتى وفاتيما وكل الناس اللى حضرت وكانت سبب فى سعادتى
بحبكم كوووووووووووووولكم
بوسه كبيره ليكم وحضونه على رأى يوسف روح قلب ماما

إلهى وسيدى ومولاى

يامن متعتنى برضاك عنى

فلا تجعل لى سبب يبعدنى عنك

.

فى البدايه وقبل اى شئ عايزاكم تعرفوا ان البوست ده مش اكتر من فضفضه
لانى قربت انفجر خلاص
وانا مش واحده منطويه ولا باعرف ابعد عن الناس لان ده بيزود اكتئابى اكتر
انا للاسف اجتماعيه جدا
وده اللى جابنى ورا
انا من فتره كبيره ونفسيتى تعبانه
ابتداء من قصه الحب اللى عشتها واللى كانت بسببها بيخرج منى اجمل كلام
ومرورا بحكايه كيارا اللى مش كلكم تعرفوها
وقفل المدونه اللى كان له اسبابه عندى
واللى هاحكيها لكم
ووصولا للحظه دى اللى اصبحت بافقد فيها حماسى للكتابه لانى حاسه انى فى شئ مكسور جوايا
لازم نتفق ان الناس اللى بتحبنى بس هى اللى تدخل مدونتى
اللى مش بيحبنى ومش بيعجبه كلامى ياريت يحرمنى من الزياره الجميله
اللى انا مستغنيه عنها
الموقف اللى حصل مع كيارا كان لازم اقول انى عرفت منه بجد مين العدو ومين الحبيب
مين اللى بيتدخل علشان يصلح بينا ويخليها مجرد سوء تفاهم ويعدى ..ومين اللى دخل يولعها حريقه ويهاجمنى ويجرحنى
فى الموضوع ده انا اتهمت انى انسانه مريضه نفسيا وانى مش طبيعيه بسبب الشعر اللى باكتبه لصديقاتى
ومنهم اميره اللى نزلت لها بوست اميرتى وكيارا وفاتيما وستيته اللى نزلت لهم البوست ده
طيب لو انا مجنونه او مش طبيعيه فانا باقول وباعلى صوتى اللى عاجبه على كده اهلا بيه واللى مش عاجبه مع السلامه

اذا كان الرسول قال لما تحب حد قوله انك بتحبه
يبقى ده غلط فى ايه؟ وعند مين؟
هو انا لما احب اعيش فى دنيا كلها خير و طيبه وحب ابقى مريضه نفسيا؟
هو انا لما اقدر قيمه الصديق جدااااااا وتكون صديقتى لها الاولويه فى حياتى اكون مش طبيعيه؟
لما اتوجع من وجع اصحابى واخاف عليهم اكون مجنونه؟
لما اخاف على مشاعر الناس وما احاولش انى اجرح حد ولا حد يجرحنى اكون بكده غلط؟

هو انا لازم اخدع الناس واغشهم وازيف مشاعرى علشان اعجبهم ؟

هو انا لازم البس الف وش علشان ابقى كويسه؟
انا مش ملاك
انا زفت وعصبيه جدااا وعنيده جدا ولما باغضب باكون زى المجرى ومش باشوف قدامى
وحساسه زياده شويتين وده اللى تاعبنى
انا بسبب كل الكلام اللى فوق ده قفلت المدونه مش بسبب كيارا
لانى لقيت تجريح وكلام كتير من غير اى داعى ومش موجود في....

اصحابى والناس القريبين منى يعرفوا كانت نفسيتى ازاى من بعد الكلام ده
يعرفوا انى كنت باقوم وانام على دموعى لانى حسيت انى اتظلمت
اللى ظلمتنى وقالت فيا كلام مش من صفاتى
الانسانه دى انا مش هاحاول انى ارد لها الاسائه بمثلها
بس هيجى يوم وهاخد حقى منها وعزة جلال الله
يوم الدين لما نقف انا وهى بين ايدى الله واقوله يارب خد لى حقى منها لانها جرحتنى قوى
انا كتبت الكلام ده يمكن احس انى ارتحت واقدر ارجع اكتب تانى
كلمه ياجماعه بالله عليكم
الكلمه الطيبه صدقه
لو دخلت اى مدونه وقريت كلام صاحبها وعجبك قوله كلمه كويسه
لو الكلام مش عاجبك يبقى حاجه من اتنين ياتعلق بطريقه كويسه من غير تجريح يااما بلاش تعلق خالص واحتفظ برايك لنفسك
لان كلماتك دى بيتوقف عليها حاجات كتير

سبب كتابه البوست ده
علشان انا ان شاء الله هاقابل فاتيما يوم الثلاثاء فى لقاء المدونين فى اسكندريه كان لازم اروح لها وانا شايله اى هم ونكد من قلبى
انا بجد نفسى ارجع اكتب تانى واحس انى سعيده
ملحوظه
اللى مننا بيتكلم عن الاسلام والدين فى مدونته يبقى لازم يراعى كويس جدا ان الكلمه امانه ولازم هو نفسه يكون قدوه ورمز للدين وياريت يكون رمز كويس .........

انا كلامى خلص كفايه كده
اسفه ان البوست كان طويل على غير العاده
بس بجد انا تعبانه
دعواتكم

عندى معلومه رفيعه كده على الماشى
واشرحها بالبلدى كده علشان كلنا نفهمها بس يارب اعرف اوصل لكم
لكل اللى بيستخدموا ويندزxp
طبعا احنا بعد فتره من الاستخدام بنلاقى ان الجهاز تقل وبدا يهنج
ويفتح اى ملف بعد سنه
هانخلى الجهاز يبقى صاروخ فى 4 خطوات بس
وانا شخصيا مجرباها

الخطوه الاولى
هانروح على قايمه start
ونكتب في run الامر ده
recent ونضغط ok هتظهر لنا صفحه نظلل ونمسح كل اللى فيها

الخطوه التانيه
هانروح على قايمه start
ونكتب في run الامر ده كمان prefetch ونضغط ok هتظهر لنا صفحه نظلل ونمسح كل اللى فيها

الخطوه الثالثه
هانروح على قايمه start
ونكتب في run الامر cookies ونضغط ok هتظهر لنا صفحه نظلل ونمسح كل اللى فيها

الخطوه الرابعه
هانروح على قايمه start
ونكتب الامر ده فى run برضه %tmp% ونضغط ok هتظهر لنا صفحه نظلل ونمسح كل اللى فيها
يعنى نفس الخطوات فى كل مره مع اختلاف الامر اللى بنكتبه

أوامر run كتيره لكن دول ابسطهم واللى مرتبطين ببعض

وهبقى انزلهالكم بعد كده ان شاء الله

انا عارفه ان معظمنا عباقره وفاهمين كل حاجه
بس ده للى مايعرفش ياجماعه
واى استفسار أنا فى الخدمه

وبالله عليكم لو حد حس انه استفاد حاجه يدعيلى

انا محتاجه دعواتكم قوى

.

زرقاء اليمامه من هي ولماذا سميت بهذا الاسم ولماذا يضرب بها المثل ؟؟؟

عربية جاهلية من أهل اليمامة. دعيت ب- (الزرقاء) لزرقة عينيها.

وقد ضربوا بها المثل في حدة البصر وزعموا أنها كانت ترى الجيش من مسيرة ثلاثة أيام.

وفي (الأغاني) لأبي الفرج الإصفهاني أن قوما من العرب غزوا اليمامة،

فلما اقتربوا من مسافة نظرها خافوا أن تكتشف الزرقاء أمرهم،

فأجمع رأيهم على أن يقتلعوا شجرات تستر كل شجرة منها الفارس إذا حملها.

فأشرفت كما كانت تفعل. فقال قومها: (ما ترين يا زرقاء؟)

فقالت: (أرى شجرا يسير!)

فقالوا: (كذبت أو كذبتك عينك) واستهانوا بقولها.

فلما أصبحوا صبحهم القوم وقتلوا منهم مقتلة عظيمة وأخذوا الزرقاء فقلعوا عينيها فماتت بعد أيام ..................

البوست ده ماكنتش محضره له خالص

ولا كان على بالى بس لقيت نفسى باكتب رساله جديده

البوست ده انا نزلته علشان اقول انى بحبكم بجد

نزلته علشان اشكركم على كلامكم اللى بيكون

ارق واجمل من النسيم فى يوم حر قوى

يارب اعرف اوصل احساسى

انا هاكتب على راحتى مع الاعتذار للغتنا الجميله

ناس كتير بافتقد تعليقاتهم عندى ولكنى بالتمس للكل الاعذار

ناس كتير منكم اتكلمت معاهم على الشات

وناس قليله اللى حكيت لهم وفضفت عن اللى فى قلبى

نزلت البوست ده علشان اشكر ناس منكم الكلمات مش هتوفيهم حقهم

ابداااااااااااااااااااا

عايزه اقول لفاتيما ام يوسف

بحبك ياأعظم ام فى الكون

واهدى لها الشعر ده

قادره
قادره اصرخ من الامك
قادره انسى الكون عشانك

قادره اعيش وياكى خوفك
قادره اتحمل ظروفك
قادره امسح لك دموعك
قادره اقيد ف الليل شموعك
قادره اديكى الامان
قادره اوهبلك حنان
عمره ما يكون يوم لغيرك
ايوه حاسس قلبى بيكى
ايوه عايشه العمر ليكى
ايوه شايفه دموع عنيكى
حسى بيه وصدقينى
قربى قلبك خدينى
للامانى قربينى
نفسى اعيش العمر جنبك

كلمه بحبك كمان لازم اقولها لكيارا

ولازم اقول مع بحبك انى باشكرك جدا

انتى اللى بتربطينى بعالم التدوين

ودايما تتصل بيا فى اى لقاء

وتحسسنى انى معاهم

وتخلينى اكلم المدونين وبالذات فاتيما

حاسه انى مديونه لكيارا بسعادتى

بحبك يااجمل وارق اخت

وده علشانك كلمات خفيفه زى دمك

ومعاها مثاثايه كبييييره خالث

الشوق

نفسى أعيش وياكى الشوق

تبقى الشمس غروب وشروق

قلبك عاشق او معشوق

ياخدك قلبى يطير على فوق

ننسى الدنيا وبالنا يروق

قربى .. حبك ليا الطوق

قلبى بعيد عنك مخنوق

مع دمى هواكى مخلوق

تيجى تعيشى معايا الشوق؟؟؟

اما بقى امى الروحيه

(امى بالروح يعنى مش عايزه ذكاء)

ستيته حسب الله الحمش

ودى من اروع الشخصيات اللى قابلتها

وفتحت لها قلبى

ولما باحتاجها بالاقيها جنبى

مش بس فى المدونه وعلى المستوى الشخصى اكتر

والله كل كلمات الشكر قليله عليكى ياامى ياستوته ياعسل

بس يمكن الكلمات دى تقدر تعبر عن اللى جوايا

قصيده حب

مصدر وحى والهامى

ونور حياتى وايامى

ياعشق قلبى وغرامى

يااحلى حلم ف احلامى

يااجمل لحن ف انغامى
يااحسن كلمه ف كلامى
يازهره ناديه ف بستانى

ياغنوه حلوه على لسانى

يافكره غاليه ف وجدانى

ياكل اهلى وخلانى

يااحمل نبع لحنانى

وليل سهادى واشجانى

يااجمل همسه فى ليل الصمت

يااجمل حلم بيه انا حلمت
يااروع بيت ف قصيده حب

يااغلى حبيبه واطيب قلب

يارب الحب اللى فى قلبى يوصلكم

انابحبكم كوووووووووولكم

بحب ايمى وبنات افكرها اللى مدوخانا

بحب ضد التيار اللى غيرت اسمها لكن قلبها زى ماهو مش بيتغير

بحب عادل اخويا الشقى وخفة دمه

بحب احمد اخويا (اسماء واحلام فى وجدانى)

اللى على طول مرابط فى المدونه ومش بيطلع منها
بحب شمس النهار جدااااااااا
وبحب عاشقه وغلبانه اللى شبهى فى كل حاجه
بحب حاسوباتيه(عقل الكمبيوتر زى ما ماما ستيته بتقول عليها)
بحب سول جدااااااااااااااااااااااا
وايوشه (اللى ضحكتنى لدرجه البكاء)
ومرمر (المتسامحه الطيبه)

وحروف ورياح الحنين (اجدع بنات فى اسكندريه)

وحور الجنه الجميله وكانها ملاك

وكوكى سونه صديقتى اللذيذه

والمصريه(الاسكندرانيه الصميمه)

والله خايفه انسى حد
كل حد اسمه مش مكتوب فى البوست فهو مكتوب فى قلبى

وفى التعليقات هبقى اقولكم انى بحبكم نفررر نفررررر

سامحونى لو نسيت حد منكم

الزهايمر بقى والسن عليه عامل مهم برضه

بحب كل اللى كلامى لمس قلبه واللى شاف انه تافهه واللى انتقده واللى عدل لى عليها

بحب المدونه بتاعتى وبحبكم قوى

الكلام كتييييييير جدا ولا الف بوست هيكفى حبى ليكم

سامحنى
سامحنى ياقلبى ظلمتك معايا
حلمت بجنه تحقق منايا
وحلمى وحلمك دا حلم الصبايا
وصحيت من الاوهام على كلمه نهايه
وصرخه منك تقولى كفايه
أصبح حبيبى بعيد وكان م البدايه
سراب ووهم كبير واخر الحكايه
دموعى ودموعك وجرح ف هوايا

.

حكايه غرامى ليست ككل الحكايات
فحبيبى حبيب من نوع خاص نوع اخر ليس ككل البشر
وقد احببته حب لا يعرفه اى انسان
حب منزه عن اى غرض او مصلحه
حب للحب فقط
هو الحبيب الوحيد فى الكون الذى يتمنى ان اكون احسن الناس
بل وافضلهم على الاطلاق
حبيبى يتمنى لى السعاده وراحة البال دائما
يفهم مايدور بعقلى دون كلام يشعر باهات قلبى
فلا يوجد بين الرجال رجل يملاء عينى وقلبى سواه
ففى حبيبى من الصفات ما جعله مميزا عن اى حبيب
حبيبى يعشق ابتسامتى .. يطير فرحا لفرحتى
لا يكون لكلامى اى معنى الا اذا تكلمت عنه
فكلامى عنه لا ينتهى
لا يكفينى الاف الاوراق ومئات الاقلام
لأصف حبى له
لا تتسع ذاكرتى لأى شئ سوى ذكرياتى معه
ايامنا الجميله .. ضحكاتنا .. نقاشنا.. نزهاتنا سويا
نصائحه التى لا تنتهى بالطريقه التى تجعلنى
لا أمل النصح
عطفه وحنانه
ثقته التى لا تنتهى فى تصرفاتى
احترامه لتفكيرى .. صدقه معى
طريقه تفكيرنا واحده
وكأننا عقل واحد فى جسدين
وقد اجمع كل من عرفنا على ذلك
فارقنى حبيبى منذ وقت قصير بحسابات السنين وحساباتكم
ولكنه طويل بحساباتى أنا
ورغم ذلك لم يتأثر حبى بل هو فى ازدياد مستمر
فقلبى وعقلى مغلقين عليه
وحتى هذه اللحظه لا ارى غيره وكأنى اعيش معه
فقد انفصلت عن العالم وصنعت له عالم خاص
احيا فيه انا وهو وذكرياتنا

"مات حبيبى"

ومااقسى هذه الكلمه وما اصعبها على قلبى
وكانى اجلده بسوط
ولكنه حى بداخلى يتنفس ويعيش واسمع صوته واراه فى احلامى
فأنا على عهدى ووعدى له واجدد معه العهد
واعرف تماما انه يشعر بى
" احبك اكثر من روحى ياوالدى الطيب"

انا لااحتاج منكم ان تواسونى فلن تجدوا بين الكلمات ما يناسبنى

ليلتئم جرحى او يصبرنى على نار فراقه
وما اقساها
ولكنى احبه ولذلك كتبت عنه وان لم اوفيه حقه من الكتابه او الوصف
فلتسئلوا عنه هذه المرأه الجميله او تلك الفتاه الطيبه فانهم اكثركم علم به

لانهم اقرب الناس الى قلبى وكثيرا ما تكلمت عنه معهم

انا اشعر بقيمه والدى منذ ان ولدت ولكنى شعرت به اكثر بعدما رحل عنى

لماذا لايشعر الانسان بقيمه الجوهره الا بعد ان يفقدها؟

.

أميرتى
يا أميره الحب والهوى
يامن بحبك قلبى اكتوى
لماذا تريدى لقلبى العذاب
ومن نبع حبك قلبى ارتوى
لماذا تريدى لعمرى الهوان
ويوم على حبك قلبى انطوى
فعودى إليه بربك فإنه
لايرى غيرك بدنيا الهوى
ولاتنسى يوم أتاك يأن
من الجرح فى أعماقه والجوى
وترك عند بابك سنين العذاب
وجائك يبحث عن الهوى

اهداء الى اختى وحبيبتى وصديقتى الغاليه اميره

أحبك فى الله

.

ااخبار تفتح النفس وتدعو للتفاؤل بصراحه


المحامون يهددون بإضراب عام
اساتذه الجامعات يهددون بتصعيد حتى الأضراب
(واخده بالك ياستيته؟)
والصيدليات كمان من كام يوم كانوا عاملين اضراب
وسواقيين النقل التقيل كانوا عاملين اضراب
وبعض المدونيين احياااااااانا

نفساوياتهم بتوجعهم فيعملوا اضراب
ويقفلوا المدونات
هى بقت موضه ولا ايه؟؟؟؟؟؟؟؟؟؟؟؟
كل الشعب بكل فئاته عامل اضراب
حلو قووووووى
طيييييب اشمعنى انا؟
انا كمان هأعمل اضراب
اينعم انا مش عارفه إضراب ليه ولا عن ايه؟
بس انا مصريه
النيل روانى والخير جوانى
وواحده من الشعب واحب اشارك
هههههههههههههه

بقولكوا ايه؟
محدش يركز فى الكلام اللى فوق ده
اهى كانت تهييسه وراحت لحالها
ادى اخر الاكتئاب ياحاجه شمس عاجبك كده؟

.