بصوا بقى ياجماعه.. الموضوع اننا انا والبت حنين القلب
فى لحظه تجلى كده كنا ناويين نروح ملجأ للايتام
يعنى احنا مش لينا نفس نعمل خير زيكم ولا ايه؟
بس للامانه الموضوع ده من قبل رمضان وفكرنا انه يكون لقاء تدوينى
يعنى من ناحيه ناخد ثواب ومن ناحيه تانيه نشوف بعض
ولان وقت رمضان ضيق
ولان العيد بعد رمضان على طول (اضافه هايله الحقيقه) صح؟
ولان بعد العيد مدارس
وعلشان كللل الحاجات دى
اجلنا اليوم ... امتى بقى يادودو ؟
ده سؤال وجيه (مين وجيه ده)... اقولكم
الميعاد هيكون يوم السبت الموافق 10/10
حد من الجماهير يقولى ما تخليه فى العيد
ارد عليه واقوله الناس اللى هتيجى من سفر
والاعياد بتبقى بهدله واحنا جايبين الناس نضايفهم مش نبهدلهم
حد تانى من صفوف الجماهير الغفيره هيقولى واشمعنى اليوم ده يادودو؟
اقوله بالعقل كده ياابنى هتكون الناس ارتاحت من دوشه العيد والمدارس
ويجوا لنا بقى على رواقه ويكونوا رتبوا امورهم
طيب يطلع واحد تانى يسئلنى هنتقابل امتى ؟
هاقوله يوم 10/10 الساعه 10 صباحا
اليوم كله عشرات اهو علشان محدش ينسى
ولانى ديمقراطيه واحب الاسئله تكون كتير واحب اجاوبها هيجى حد يسئلنى
هنعمل ايه بقى فى اليوم بتاعنا ده؟ هارد واقول
هانتجمع ونروح كلنا على ملجأ ايتام نقعد معاهم شويه وناخد حسنات كتيييير
ونروح بعد كده على كافيتريا سيد درويش فى بحرى
على البحر مباشرتا ونقعد نتعرف ونتكلم مع بعض
ويجينى سؤال تااانى بيقول
مين الصُحبه يادودو؟ دى اهم حاجه
طبعااااااا معانا فاتيما روح قلب المدونين كلهم
ومعانا خالد همس الاحباب ابو همس الجدع قوى
وصاحبه الفكره الجميله من الاساس حنين القلب صديقتى الغاليه
ومعانا عادل بتاع الحكومه لو مش هيجى لاشرحنه
وكيارا عالم مولان ان شاء الله هتيجى برضه
والاستاذ هانى اللى نط فى الكوز باذن الله هيجى
ومعانا باذن الله ناس كتييييير هيكونوا مفاجئه اللقاء
ومش هاعلن عنهم الا لما يدونى الموافقه الاخيره
وطبعا فى انتظار كل الناس الحلوه دى
دودو عاشقه الرومانسيه
وحنين القلب
وقبل اللقاء بشويه هانروح الملجأ و نعرف لكم كلللل التفاصيل
ونعمل اعلان نهائى تاااااااااانى قرب الميعاد
وحشتووووونى ونفسى اشوفكم نفر نفررررررر