قضت عمرها كله فى حلم حتى انصدمت احلامها فى صخرة الواقع

صوت بداخلها ينادى يجب ان تستيقظى من حلمك الان فالحياه تختلف كثيرا عن الاحلام

يصر من حولها على ايقاظها ولكن باسلوب مؤلم لروحها واحساسها المرهف

عقلها يرفض بشده مجرد الفكره ان تحيا دون حلم ..

هل الموت الان افضل؟؟؟

شئ بداخلها يجيب انتى بالفعل الان ميته فلا فرق بين موتك او قتلهم لكى

لا يشعر احد بوجعها سواه .. فاين هو الان ؟؟؟

هل فارقتها روحها معه فى طريق اللاعوده والان هى تحيا معهم بجسدها فقط؟؟؟!!!!

اااااااااااااه ... كم تشتاق اليه .. كم تحتاج له الان

بحثت كثيرا فيمن حولها لتجد شخص واحد يؤتمن على احساسها بعده.. فلم تجد

هى تحتاجه الان بشده فلطالما اتخدوا القرارات المصيريه سويا

تسترجع كلامهم لها

اين رجاحة عقلك اللتى كان يثق بها .. اعتمدى على نفسك واتخذى قرارك

الان هى تصارع موج الحياه وحدها

إما نجاه وإما غرق

إما موت او حياه تساوى الموت

تنظر لصورته وتبكى بشده

أاااااااه يا أبى لو تعلم مدى الفراغ اللذى خلفته ورائك

زى النهارده 15 يناير من كل سنه بيوافق عيد ميلادك

بقالى 3 سنين مش باحتفل بيه لانك غايب عنى

لكن بافتكرك انا واخويا وماما ودايما بندعى لك

تعرف انك واحشنى قوى؟

اكيد عارف ... لانك جيت لى امبارح فى الحلم

وخلتنى اشوفك كان شكلك حلو قوى وملامح وشك صافيه قوى

وكالعاده كنت بتدافع عنى لانك انت الوحيد اللى فاهمنى

وانا اشتكيت لك كتير منه ومن قسوته عليا وقد ايه انا اتحملته و ازاى باعنى وكنت بابكى بانهيار

وكانك كنت مسافر ورجعت لى ... ياااااااااااااااااه لو حلمى يتحقق وتكون مسافر وترجع تانى

السنه دى زى السنتين اللى فاتوا مش هقدر اقول كل سنه وانت طيب لان الطريقه لازم تختلف

لكن هاقول الله يرحمك وانت مش محتاج يوم افتكرك فيه لانك على بالى كل يوم

بحبك لاخر نفس فى عمرى ياابويا

انا باعتذر عن الالم اللى فى البوست ده قبل ما حد يقراه

لانى كنت ناويه مش اكتب فى المدونه دى حاجه تزعل حد تانى ابدا

بس البوست ده لازم يتكتب

واعتبروها فضفضه

***********************************

النهارده بالذات اصعب يوم مر فى تاريخ حياتى

النهارده بالذات لازم افتكرك
طيب وانا كنت امتى نسيتك
بس تعرف انك وحشتنى
بقالى كتير مش فكرت اتكلم معاك
ياااااااااااااااااااه
قد ايه زعلانه من نفسى
هو انا ممكن اكون انشغلت عنك؟
طيب ازاى انشغل وانا كل كلامى لازم افتكرك فيه
لازم اجيب سيرة شئ يخصك
لازم اقول اصله كان بيقول كذا.. اصله كان بيعمل كذا
فاكر لما كنت باحكى لك كل شئ يخصنى ؟
انا دلوقتى محتاجه قوى انى احكيلك
محتاجه اخد رايك
محتاجه انك تاخد ايدى وانا عروسه

وتوصلنى لخطيبى وتوصيه عليا
محتاجه تربى اولادى وتدلعهم زى ما دلعتنى
محتاجه اتكلم معاك..محتاجه افكر معاك
محتاجه اخرج اتمشى على البحر معاك

ونتكلم زى زمان .. يااااه فاكر؟
لو كنت موجود حاجات كتير كانت اتغيرت
حماده اتجوز ومسئوليته زادت واكيد انت حاسس بيه وفرحان
انت خلفت لى راجل بجد يعتمد عليه

ربنا يحميه ويحفظه ياااارب
الله يرحمك ..انا كمان فرحانه بيه

كان حلم عمرى انى اشوفه عريس
وكان حلم عمرك انك تشوفنى عروسه
انا عشت واتحقق حلمى
وانت سيبتنى قبل ما تحقق حلمك

..نصيب اللهم لا اعتراض

كل الموضوع ان لما بتضيق بيا الدنيا قوى وابص حواليا

مش بالاقيك باموت الف مره
اصل مفيش حد ياحبيبى فاهمنى زيك
محدش بيحبنى زيك
حتى هو بكل الحب ده باشوف ان حبك ليا اكبر منه بكتير
عايزه احكى لك عنه
انا شفته بعينك وبنظرتك فى الناس
تصورت ممكن رايك فيه يكون ايه
ووافقت انه يدخل حياتى
انا كلمته عليك كتييييييير
هو عارف انك نقطه ضعفى
عارف انى من بعد ما فارقتنى نسيت معنى الضحكه
بيحاول يعوضنى عنك بس مش دايما بيقدر
رغم انه بيعمل كل شئ علشان يرضينى
حماده كمان مش بيحاول يزعلنى خالص
ومش بيخلينى اتحمل مسئوليه حاجه خالص

رغم انه اصغر منى .. مش بقولك راجل
وماما زى ماانت عارف طيبه وبرضه بتحاول ترضينى
لانهم عارفين ان فارق معايا غيابك قوووى
انت فعلا كنت نعم الاب الطيب

ونعم الصديق وفى

ونعم الاخ الحنون
انت كنت ومازلت كل شئ فى حياتى
ااااااااااه ياابويا لو يعرفوا انت عندى ايه
تعرف ان نفسى اجيلك
نفسى اقف على قبرك وحدى واتكلم معاك وتكون سامعنى
نفسى اقف على قبرك وابكى ابكى لحد ما يغمى عليا

يااااااااااااااااااااااااااااااااه
هتعدى سنه كمان وانت بعيد؟
هتعدى سنه كمان وانت فى مكان وانا فى مكان؟
هتعدى سنه كمان وانا مش باسمع صوتك؟
هتعدى سنه كمان وانت مش بتمسح دمعتى وتطبطب عليا؟
بس السنه دى مختلفه عن السنتين اللى فاتوا
السنه دى جزء من احلامك لينا بيتحقق
اصلك ياحبيبى كنت بتحلم لينا
عمرى ما شوفتك بتفكر لنفسك
عمرك ما كنت انانى
طيب انت عارف انى بحبك قوى
ولو فيه اكتر من الحب هيكون ده احساسى بيك
وحشتنى جداااااااااااااااااااااااااااااا
يااغلى و احن واطيب اب فى الكون

ياترى لو شفتك دلوقتى هاعمل ايه؟ ياترى لو رجعت لى ولو يوم واحد هيكون احساسى ايه؟ هاتصرف ازاى؟ هاخدك فى حضنى؟ هابوس جبينك وكل جزء فى وشك؟ هابوس ايدك واتوسل اليك انك ما تغيبش عنى تانى؟ هاحكيلك على كل شئ حصل من يوم ما فارقتنى؟ ما احنا متعودين انى باحكى لك على كل شئ ... يااااااااااه
قد ايه واحشنى كلامى معاك .. قد ايه واحشنى نظرة عينيك.. قد ايه واحشنى المس شعرك وابوس جبينك واشم ريحه البرفان بتاعك
قد ايه واحشنى قعدتى جنبك وانت بتحلق ذقنك وكلامنا سوى .. قد ايه واحشنى لمسه حنيه منك لما ايدك تمسح دموعى وتواسينى وتصبرنى على الايام .. قد ايه واحشنى نصايحك لى وتحذيراتك اللى رغم كترها لسه بأدى الامان للناس قوى وبتوجع قوى
كنت دايما تقولى" انتى عبيطه اللى يضحك فى وشك يبقى حبيبك "تعرف ان عندك حق
تعرف ان الدنيا من غيرك صعب قوى انى اتحملها؟ زادت قسوتها علي بعد فراقك .. ليه وانت معايا كنت باعيش زى طفله؟ وليه بعد فراقك حسيت ان الطفله دى ماتت؟.. ليه بعد فراقك بقيت باخاف افرح ؟ .. ليه مش قادره احس باى معنى للسعاده بجد؟ .. ليه حاسه بوحدتى رغم وجود ناس كتير جنبى بتحبنى؟ .. ليه وانا معاك كنت حاسه باستمرار انى صح ومش باغلط؟ لانك جنبى وبتلحقنى قبل ما اقع تسندنى .. ليه بعد ماسبتنى وقعاتى بقت كتير؟ .. ليه بقيت باتخبط فى الدنيا وانصدم فى الناس؟ .. ليه حاسه انى عقلى وقف بعدك؟ مااحنا كنا عقل واحد فى جسدين .. كنا بنكمل بعض .. كنا نشبهه بعض فى كل حاجه كنا بنفكر بصوت عالى مع بعض ..
ليه مش قادره اسامح اللى جرحوك فى يوم من الايام؟ .. ليه دموعك اللى شفتها بسببهم واقفه بينى وبينهم؟ .. ليه باكون طيبه مع كل الناس وغصب عنى باكون شرسه معاهم؟ .. ليه الكون ده كله بكل البرااااح ده ضيق عليا؟ .. ليه مش عارفه اعيش؟ ..
ليه وانا واقفه على قبرك كنت حاسه انهم بيدفنونى معاك خدوا روحى وسابوا لى جسد من غير روح
كنت دايما تقولى" انتى بنت ب 100 راجل"
حاولت اكون كده فعلا بعد فراقك بس بيجى عليا وقت واضعف واحتاجك
انت حاسس بي؟ .. طيب مش بتيجى لى فى المنام ليه؟ .. طيب عارف انك واحشنى؟ .. ..
طيب عايزاك تعرف لحد مااجيلك انى بحبك ومفتقداك ومش عارفه اعوضك باى حد

حكايه غرامى ليست ككل الحكايات
فحبيبى حبيب من نوع خاص نوع اخر ليس ككل البشر
وقد احببته حب لا يعرفه اى انسان
حب منزه عن اى غرض او مصلحه
حب للحب فقط
هو الحبيب الوحيد فى الكون الذى يتمنى ان اكون احسن الناس
بل وافضلهم على الاطلاق
حبيبى يتمنى لى السعاده وراحة البال دائما
يفهم مايدور بعقلى دون كلام يشعر باهات قلبى
فلا يوجد بين الرجال رجل يملاء عينى وقلبى سواه
ففى حبيبى من الصفات ما جعله مميزا عن اى حبيب
حبيبى يعشق ابتسامتى .. يطير فرحا لفرحتى
لا يكون لكلامى اى معنى الا اذا تكلمت عنه
فكلامى عنه لا ينتهى
لا يكفينى الاف الاوراق ومئات الاقلام
لأصف حبى له
لا تتسع ذاكرتى لأى شئ سوى ذكرياتى معه
ايامنا الجميله .. ضحكاتنا .. نقاشنا.. نزهاتنا سويا
نصائحه التى لا تنتهى بالطريقه التى تجعلنى
لا أمل النصح
عطفه وحنانه
ثقته التى لا تنتهى فى تصرفاتى
احترامه لتفكيرى .. صدقه معى
طريقه تفكيرنا واحده
وكأننا عقل واحد فى جسدين
وقد اجمع كل من عرفنا على ذلك
فارقنى حبيبى منذ وقت قصير بحسابات السنين وحساباتكم
ولكنه طويل بحساباتى أنا
ورغم ذلك لم يتأثر حبى بل هو فى ازدياد مستمر
فقلبى وعقلى مغلقين عليه
وحتى هذه اللحظه لا ارى غيره وكأنى اعيش معه
فقد انفصلت عن العالم وصنعت له عالم خاص
احيا فيه انا وهو وذكرياتنا

"مات حبيبى"

ومااقسى هذه الكلمه وما اصعبها على قلبى
وكانى اجلده بسوط
ولكنه حى بداخلى يتنفس ويعيش واسمع صوته واراه فى احلامى
فأنا على عهدى ووعدى له واجدد معه العهد
واعرف تماما انه يشعر بى
" احبك اكثر من روحى ياوالدى الطيب"

انا لااحتاج منكم ان تواسونى فلن تجدوا بين الكلمات ما يناسبنى

ليلتئم جرحى او يصبرنى على نار فراقه
وما اقساها
ولكنى احبه ولذلك كتبت عنه وان لم اوفيه حقه من الكتابه او الوصف
فلتسئلوا عنه هذه المرأه الجميله او تلك الفتاه الطيبه فانهم اكثركم علم به

لانهم اقرب الناس الى قلبى وكثيرا ما تكلمت عنه معهم

انا اشعر بقيمه والدى منذ ان ولدت ولكنى شعرت به اكثر بعدما رحل عنى

لماذا لايشعر الانسان بقيمه الجوهره الا بعد ان يفقدها؟

.