أضحك وأفرح وأنسى ألامك

أحلم حقق كل أمالك

مهما يكون الحلم بعيد

لسه باقى كتير قدامك

حلمك شجره لو ترويها

تطرح لك اجمل ازهارك

روحك محتاجه تغذيها

بابتسامات ليلك ونهارك

ايه يعنى حبيب جرحك .. خانك

ايه يعنى صديق صنته ما صانك

ايه يعنى ضياع رزق ومال

يبقى اكيد ده مش علشانك

عايش جنبك ناس حاسينك

عايش جواك ناس حبينك

ارضى بالمكتوب والقسمه

واحمد ربك مهما جرالك

البوست ده اهداء خاااااص جدا لستيته حسب الله الحمش

طبعا ياجماعه كلنا ملاحظين موجة النكد اللى مغطيه المدونات وبقت زى الوباء

وللاننا بنحاول نكافح النكد ده ومدونتى هتخضع للتطعيم قبل اى مدونه فاحنا هنحاول نقوم بحمله اسمها ابتسم

وطبعا الحمله دى بتاعتنا كلنا وكلنا هنشارك فيها

هدف الحمله

* رسم ابتسامه على وجه كل انسان وابدأ بنفسك اولا

*مدونات خاليه من الاكتئاب

طرق المشاركه هتكون كالاتى

*زي ما قلنا هنبدأ بنفسنا فمطلوب من حضرتك دايما تبتسم وطبعا هنطبق ده على حياتنا العامه خارج المدونات ونحاول نبتسم قدر المستطاع

*ولانك بشكل او باخر بتأثر فيمن حولك فمطلوب من سعادتك تكتب لنا بوست كوميدى فى مدونتك او يكون فيه فكره كوميديه حتى لو كان موقف مر عليك (ماهى مش دايما كحلى يعنى اكيد بيجى وقت ونضحك)

*اللى يحب ينشر الفكره يتفضل ياخد الصوره ويعلن عنها فى مدونته

*اى حد مش بيعرف يكتب كوميدى ممكن ينزل بوست يعمل فيه تنويه عن اكتر بوست كوميدى عجبه فى اى مدونه وعلق معاه ويخلينا احنا كمان نقراه وبكده ممكن نعرف مدونات اكتر ونتواصل مع بعض اكتر واكتر

*كل واحد هيدخل التعليقات هيقولى ايه اكتر شئ ممكن يضحكه او على الاقل يرسم بسمه على وشه

ملاحيظ هامه

احنا مش بنفرض على حد اى تصرف ضد رغبته واللى عايز مدونته كئيبه هو حررررر

ولكن عملا بقول الرسول صلى الله عليه وسلم (تبسمك فى وجه اخيك صدقه)

يعنى هتضحك وتضحك غيرك وكمان هتاخد ثواب

قد قال رسول الله- صلى الله عليه وسلم-: "روِّحوا القلوب ساعة فساعة"

قد وردَ عن نبيِّ الله موسى- عليه السلام- أنه قال للخضر: أوصني. فقال الخضر: "كن بسَّامًا ولا تكنْ غضَّابًا"

ده من ناحية الدين .. اما من الناحيه العلميه فالابتسامه بتحرك مااعرفش كاااام عضله فى الوش والله ما فاكره بس هما حبه كتير يعنى

ههههههههههههههه

مش عايزه حد يدخل يقفلها فى وشى ويقولى البلد والعيشه واللى عايشنها الله يكرمكم

كده كده الحياه بقت لونها غامق بزياده احنا بقى دورنا نخليها بمبى مسخسخ (:

اصلها مش مستحمله

حد فصيح يطلع يقولى ازاى اضحك مع اوضاعنا المنيله دى

هاقوله زى ستيته ما قالت ان السعاده اراده

دور على اى شئ يخليك سعيد ....أضحك مع زمايلك

ادخل عند عمك جوجل وهات نكت واضحك عليها

ألعب مع اولاد الجيران واستمتع بضحكاتهم هتلاقى نفسك اوتوماتيك بتضحك على ضحكهم

والغنوه دى كمان هديه منى لكم

وكمان الفيديو ده علشان بيضحكنى بشكل هيستيرى

قبل اى شئ مش عايزه حد يتخض دى انا وعمرى سنه واحده


ودى سنتين مع هيما حبيبى بابا الغالى

ودى ثلاث سنين مع نور عينى برضه

وكفايا لحد كده خوفا عليكم ههههههههههههه

اول مره حد يعمل بوستين لعيد ميلاده صح؟
يلا اهو يبقى اختلاف برضه والسبب انى كنت امبارح فعلا مبسوطه ومش قدرت استنى للنهارده
والحمد لله النهارده كمان قمت من النوم مبسوطه جدا
واول شئ عملته طبعااااااااا انى مش رحت الشغل (فالحه مش كده؟؟؟)
ثانيا فتحت الكمبيوتر ( يمكن قبل ما افتح عينى ) هههههههههه
واول شئ شفته بوست ستيته روح قلبى وتهنئتها الجميله هنا وانشكحت جدااااااا
وتفائلت بيها طبعا وكلمت ناس كتير حلوين يهنونى زى صبرنى يارب
واحساس طفله محبه للرومانسيه من الياااااااااابان تخيلوا بقى احساسى وفرحتى باهتمامها للدرجه دى
وهى بتبلغكوا سلامها جميعااااااااااااا
وزى الاستاذ خالد همس الاحباب الف شكر لذوقك ياابو همس دايما صاحب واجب

وطبعا دور البطوله النهارده لصاحبتى واختى الغاليه حنين القلب
بجد انا تعبتك قوى النهارده ياحنونه ربنا ما يحرمنى منك ابدااااااااا
وشكرا على اليوم من اوله لاخره وشكرا على البوست الجميل ده
وطبعا باشكر شيما مدونه الشعب لابد له من حكومه تشكمه على تهنئتها ليا فى البوست ده
وقبل الكل زى ما قلت البوست اللى فات كانت سالى حاجات جوايا
اللى عملت لى بوست فى مدونه جديده خاااااااااالص وافتتحتها انا باول بوست واول تعليق هتلاقوه هنا
وشكرا ليوسف روح قلب فاتيما على تهنئته الرقيقه جدا ربنا يردك لها ولنا قريب بإذن الله
وده كان بالنوسبه للتدوين واهله على رأى فاتيما
اما على مستوى بيتنا فكما توقعت حفله جميله بتدبر فى الخفاء
وطبعا بعلم البت السوسه حنين ومش قالت لى وترتيب حماده وام حمبوذوا
طفينا الشمع واكلنا التورته ولعبنا بالصواريخ واتصورنا وغنينا ورقصنا
وفعلا كان يوم جميل الحمد لله
البوست ده طبعا تكمله لما قبله فالتعليقات مفتوحه على البوست التانى
كان معكم من قلب الاحداث دودو ابو حفيظه (:

مبسوووووووووطه جدااااااااا ليه؟
لا بكره اقول لكم ولا اقول النهارده؟
افكر........
طيب نسيب السبب للاخر واقول لكم الاعراض

الصبح قمت من النوم مبسوطه ومزاجى رايق
رحت الشغل هزار مع زمايلى وضحك هيستيرى واليوم عدى لطيشف ظريف على غييييييير العاده
الحمد لله..... نمسك الخشب
جاتنى هديه شيك جدااااااااااااااا وجميله جدا من حنين القلب صديقتى الغاليه
(عقبال ما اردها لعمر باشا لما يوصل بالسلامه يارب)
وهديه وصلت لى من فاتيما روح قلبى فى يوم البؤجه رغم غيابى عن الحضور
وكمان افتكرتنى ووزعت حاجه حلوه باسمى
(بجد ده كتير عليا يابطه قوى)
وجاتنى رسايل على الموبايل من ايوشه ومن وردشان
ومكالمه من ستوته علشان تكون قبل اى حد
(دايما سابقه فى قلبى بخطوه ياحبيبتى وكلمتين يخلوا المعنويات فى السمااااااا)
وهديه جاتنى من كيارا رغم انها فى بلد تانيه لكن مش نسيانى
(الف شكر ياكيكى والف سلامه على ماما )
وكلمنى على الميل وهنانى ناس كتير جدااااااااا
منهم ريم رسائل بلا بريد وحنين همس الاحساس وابراهيم العدوى
وشيما الشعب لابد له من حكومه تشكمه
وسالى حاجات جوايا اللى عملت لى بوست جامد فى مدونه جديده هنا الف شكر يا حماتى الغاليه
و شيكو صديقه الطفوله واختى الغاليه جدا واختها كوكى والاغانى اللى بعتوهالى جميله
حسيت بجد بقيمه فرحتى بينكم
حتى الرسايل اللى بيبعتها المنتديات اللى باشترك فيها
مخليه طعم اليوم مختلف
كده الموضوع شرح نفسه خالص
اكيد عرفتوا السبب ........لسه مش عارفين؟؟؟؟
طيييييب اسهلها لكم شويه انا عارفه... اسئلتك معقربه قوى يااستاذ طارق
كل سنه وانا طيبه (:
زى ما قلت ان ده بوست مؤقت
يعنى كلها كام ساعه واخر اليوم انقل لكم تقرير مفصل بالاحداث اللى بتحصل على مستوى بيتنا (:
لما اشوف بيدبروا ايه من ورايا
سلام مؤقت ياحبايب قلبى من جوه

البوست ده لاهو فصحى ولا عاميه

البوست ده شويه كلام والسلام خدوه على بعضه كده زى ماهو

لانى عايزاه يطلع منى كده زى ماهو وفى البوست ده شويه اكتشافات

اكتشفت ان كل الناس بلا استثناء وانا منهم لهم وشين وتلاته مش وش واحد

اكتشفت ان فى مدونات اصحابها بوشين بمعنى الكلمه وعندهم كذا مدونه وبينهم تناقض رهييييب دى شيزوفرينيا ولا ايه؟

اكتشفت ان حتى التدوين مش عالم مثالى زى اللى فى خيالى وان العالم اللى باحلم بيه هيفضل فى خيالى وبس

اكتشفت ان فى ناس طول ماهما بعيد ليهم بريق زى الماس ولما تقرب منهم تلاقيهم زجاج

اكتشفت انى مش بحب الشتاء غير فى حالات معينه وعلى شط البحر بس

اكتشفت انى باكون قويه قوى فى اوقات بيتوقع فيها من حولى انى ضعيفه

اكتشفت انى باكون ضعيفه قوى لما اكون فى حاله حب

اكتشفت انى شخصين عايشين فى جسد واحد

انا انسانه هاديه قوى وعصبيه قوى .. عاقله قوى ومتهوره قوى .. حنينه قوى وقاسيه قوى ..جدعه قوى وندله قوى .. شعله نشاط وقمه فى الكسل .. زكيه جدااااا واحيانا باكون غبيه جدا جدا

اكتشفت ان مش فى كل وقت بلاقى نفس الاهتمام من من حولى بقدر اهتمامى بهم وحجتهم الحياه ومشاغلها فبدأت ابعد عن الكل لا اراديا ومن غير ماافرق

اكتشفت انى مش باعرف قيمه الجواهر اللى فى حياتى غير لما تضيع منى .. ده غباء صح؟

اكتشفت انى مش باعرف اوزع اهتمامى على كل اصحابى بالتساوى وده بيضايقهم

اكتشفت ان النت وعالم التدوين اخدنى من دنيتى الحقيقيه ومن اصحابى اللى بحبهم لدرجه انى بطلت ازورهم

اكتشفت انى ساذجه جدا .. كلمه تودينى وكلمه تجيبنى .. لكنى مش غبيه وبافهم كويس قوى

اكتشفت انى عايشه بقيم ومفاهيم انقرضت من زمان واللى يسمعنى يقول عليه هبله

اكتشفت ان قلبى لسه بيدق وقادر يحس بكلمه حلوه طالعه بصدق :)

كفايا كده ولما اكتشف حاجه جديده هارجع اقولها لكم

دى تورتايه علشان بكره
السبت 5 ديسمبر عيد ميلاد اخويا حبيبى حماده
كل سنه وانت طيب ياابو حميد
وعقبال مااحتفل بعيد ميلاد ولادك ياااارب

ودى صور الطفوله المشرده نياهاهاهااااا

ودى ياحبيبى لما كنت ارهابى هههههههههههههههههه

ودى كانت فى خروجه لينا مع بعض لوحدنا وكان يوم جميييييل

ودى كانت فى مطروح فى شهر العسل

ختامه مسك ومسك الختام حبيبتى وحبيبتك نونه

ودى اخرتك ان شاء الله ههههههههههههههههههههههههههههههههههههه

لازم بعد تهنئتك بعيد ميلادك ابارك لك لانك هتبقى ابو جلمبو
يوووووووه قصدى ابو حمبوزو
(:
عايزه بنت حلوه زى دى

او ولد شبه ده منيييين .. مااعرفشششششششش
اتصرف..
مبروك ياحبيبى وكل سنه وانت طيب

عادت الى منزلها .. بدلت ملابسها .. نظرت فى مرآتها ..فردت شعرها خلفها ..أخذت تداعبه برقه .. فهى تشعر بهدوء غريب لم تألفه روحها من قبل .. نظرت الى ملامح وجهها وأقتربت من المرآه ... حدقت فى عينيها .. نعم إنها ترى هذه اللمعه وتلك النظره اللتى حدثها عنها منذ قليل..وذلك البريق اللذى يأسر قلبه ..إنه يستمع لحديث عينيها كثيرا بلا ملل .. فهى تعشق الصمت امامه .. ولكن عينيها تفضحها بما تحاول ستره ..

هى جميله اليوم بشكل عام .. وقد كان جمالها واضحا له ولنفسها .. وجهها اكثر نضاره .. بشرتها صافيه .. عينيها لامعتين.. ابدى اعجابه بها وبثوبها الرقيق بالوانه الناعمه الهادئه .. قلبها يخفق بشده عند سماع كلماته .. يقبل يدها .. يؤكد لها ان حبها مازال فى قلبه .. يعتذر .. يندم.. فتسامحه

أبتسمت لنفسها أبتسامه عريضه وضمت كتفيها بكفيها وكأنها تحتضن نفسها

أفاقت من شرودها على صوت أنغام وكأنها تتحدث بلسان حالها

على الهامش
مفتاح قلب المراه فى اذنها والرجل فى عينيه

كل سنه وانتم طيبين يااغلى اخوات فى الكون كله
انا جايه النهارده بينكم علشان احس بفرحه العيد بجد
واكتشفت ان اى فرحه مش بيكون لها طعم بعيد عنكم
- حقيقه لا تقبل المناقشه-
كل سنه واحنا لربنا اقرب
ولاهلنا واحبابنا اقرب
ولبعضنا اقرب
كل سنه وكل واحد فينا فرحان ومرتاح باله ومحقق امانيه
كل سنه وكل من له حبيب غايب ربنا يردهوله
ربنا يتقبل مننا كلنا صيام عرفه ويكتب لنا الوقوف عليه السنه الجايه ياااااااااارب
شفت الحجيج فى التليفزيون دموعى نزلت لوحدها
نفسى اكون معاهم نفسى قوى اروح هناك يارب حقق لى الامنيه دى

قولولى بقى

مين هيدينى عيديه؟
تصدقوا انا اكتشفت انى عيله قوى ولسه بافرح بالعيديه زى زمان
اخدت عيديه من اخويا واخدت عيديه رمزيه من زملائى فى الشغل
والبت حنين القلب فى ذمتها ليه عيديه
هاروح اعيد عليها مخصوص علشان اخدها خليكم شاهدين
(:

معلومه هامه جدااااا :-
انا بحب الفته مووووت مين هيعزمنى عليها؟؟؟؟

دمى بيغلى .. ماتش كوره بسببه نتهان ونتبهدل بالشكل ده .. لييييه؟؟؟
المصريين بيتضربوا فى السودان من الجزائريين والحكومه السودانيه نايمين فى العسل
قبل الماتش بيشجعوا معانا ورافعين علم مصر ..بعد الماتش بيشجعوا مع الجزائرين
مش دى المشكله مش ان السودانيين معاهم معاهم عليهم عليهم
ولا مشكلتنا دلوقتى ماتش كوره دى بقت حرب بكل معنى الكلمه
والمطار السودانى فى الخرطوم مقفول والحكومه السودانيه مختفيه بعد الماتش مباشرتا
ناس من عندنا اتصابت كتير ومفيش حتى اسعاف
المشكله ان المصريين متهانيين فى كل مكان مش بس فى السودان
الجزائريين بيضربوا المصريين فى الكويت
فعلا شعب دموى متعصب ومتخلف كمان
ايه القرف ده؟ ايه المهانه دى؟ احنا مالنا هاينين على حكومتنا ليه كده؟
مفيش رد ليه على الاهانات دى؟ حلقه عمرو اديب من برنامج القاهره اليوم بجد تحرق الدم
ليه نتعامل بمنتهى الاحترام وتتقابل معاملتنا دى بمنتهى المهانه؟
الاتوبيسات بتتكسر ستات وشباب بيتضربوا امال لو كنا كسبنا كان حصل ايه؟
ليه احنا بس كمصريين اللى عايشين فى وهم الاخوه العربيه
والحقيقه اللى اكتشفتها النهارده ان مفيش حد من العرب بيحبنا
اللى بنقول عليهم اخواتنا اصبحوا هما اعدائنا
انا كارهه عجز حكومتنا وكارهه اكتر عجزى انى مش عارفه اعمل حاجه للناس دى
عرب ايه وزفت ايه؟ ملعون العرب اللى ياكلوا بعض كده ..
ملعون الكوره وملعون التعصب اللى يخلينا نعمل فى بعض كده
الناس هناك مش قادرين يتحركوا حتى فى الشوارع
والى متعور واللى بينزف والناس بتموت ..مستنيين ايه ؟
مستنيه ايه يامصر علشان تحمى ولادك ؟؟ نفسى اصررخ يمكن ارتاح
اخرتها ايه يابلدى؟ اخرة الذل ده ايه يامصر؟
حسبى الله ونعم الوكيل
حسبى الله ونعم الوكيل
حسبى الله ونعم الوكيل

طبعا كلنا شفنا مدونه فاتيما وبنتابعها
وكلامها ليوسف فوق الوصف
كل معانى الامومه والحنان بين سطورها
تحس بيها بتحضنك بكلامها ومشاعرها الدافيه
وده شئ تحسه من اول سطر فى اليوسيفيات
طيب دى فاتيما بكل امومتها وحنانها
ياترى يوسف ممكن يقول لها ايه؟
ماتيجو نشوف

اسمحى لى ياطمطم اهدى الفيديو ده لكل امهات بلوجر
واهداء خاص جدا لحنين القلب ام عمر

ولدكتوره ستيته حسب الله الحمش

ولنوران بت خيخه واى كلام

هنا تجد راحتها اكثر من اى مكان اخر

هنا حيث لا يوجد بجوارها اى انسان ..هى والطبيعه وكفى

هنا فى عالمها وتحت تلك الشجره الكبيره تستلقى على ظهرها

خارج حدود الزمن خارج نطاق الوقت

وامامها جدول الماء ينساب بشكل جذاب

وهذا البحر كم كان لها الصديق الوفى بحق

كم سمع منها وكم كان امين على اسرارها

جلست هنا تنظر الى السماء الصافيه فهى تعشق لون السماء

وتلك الشمس الذهبيه بنورها الدافئ دون شعاع

هنا تستمتع باصوات الطيور وتغريد البلابل فوق اغصان شجرتها

ترى حولها جميع الوان الزهور فكم تعشق تلك الورود الحمراء

كم تمنت ان يهدى لها حبيبها ورده حمراء

لكنها قررت ان تهدى لنفسها تلك الورده

لانها قررت ان تحب نفسها اكثر

ان تعتنى بها اكثر.... لانها تستحق منها ذلك

همست لنفسها بافكار مجنونه ففى عالمها كل شئ مباح

تمنت ان تكون عصفور رقيق صغير يطير هنا وهناك

فارتفعت بجناحيها فوق السحاب واقتربت من اشعه الشمس

تعلو وتهبط فى فرح شديد

تمنت ان تكون عروسه البحر فغاصت فى اعماقه

وشعرت بحنانه عليها عندما ضمها البحر بامواجه

واختارت من الوان اللؤلؤ واحجامه ما طاب لها

واستمتعت كثيرا بتلك الاسماك باختلاف الوانها واشكالها

فعالمها حقا رااااائع الجمال زاهى الالوان لايوجد به مكان للون أسود

وعادت مره اخرى للشاطئ عند تلك الشجره واخذت تشدو باغنيتها المفضله

فتجمع حولها جميع الحيوانات ورقص موج البحر فرحة لفرحها

وتلألأت النجوم فى السماء وغردت الطيور معاها

فكم كان عذب صوتها بدرجه لا يتخيلها بشر

وكم شعرت هى بهدوء وسكينه بعيدا عن الناس

فهى وعالمها ولا احد سواها........

بقالكم فتره مرتاحين من وجع الدماغ والصداع والانقلاب اللى بيحصل فى البلوج بسبب التاجات

فجبت لكم تاج على الماشى كده واهو يكون نوع من الترويح عن النفس بدل الكأبه اللى غرقان فيها بلوجر واهله من فتره

نبدأ بسم الله ونقووووول أكشن

اسمك واسم مدونتك؟

دودو عاشقه الرومانسيه - مدونه نبضات قلب ولهان

احب الالوان؟ الايام؟ الارقام؟

الازرق بدرجاته – الجمعه علشان اجازه – الارقام الزوجيه

برجك وتاريخ ميلادك؟

القوس – 14 ديسمبر

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : هسيبها لكم انتم تحكموا فيها

العيوب: عصبيه جدااااا – متقلبه جداااااااا – عنيده جدا جداااااااا – ردود افعالى سريعه جدااااا

الصبر

ماهو مكانك المفضل؟

- البحر طبعاااااااااا

ايه هى هوايتك المفضله؟

كتابه الشعر والقراءه بس ده كان زمان (:

ما المقوله اللى تؤمن بها؟

لا تحسبن سرورا دائما ابدا **فمن سره زمن سائته ازمان

اجمل هديه قدمت لك من مين؟

مصحف من مُدرستى عبير عمر وعبله مجوهرات شيك جدا وعروسه من فاتيما

اسعد يوم فى حياتك؟ واتعس يوم فى حياتك؟

كل يوم عشته مع بابا واتكلمت معاه فيه كان يوم سعيد

اتعس يوم كان وفاه بابا

موقف طريف لا ينسى من ذاكرتك؟

ابقوا اسئلوا حنين القلب (موقف الصلصه) ده اللى انا فاكراه

معاك ثلاث وردات لمين تهديهم ؟

ليه الاحراج ده بقىىىىىى؟؟؟؟؟؟؟؟

واحده للمدونيين وواحده لاصحابى المقربين وواحده لزوج المستقبل بس يارب يكون يستاهل

معاك ثلاث رصاصات على من تطلقهم؟

واحده على اليهود وواحده على اى حد بيجرح فى اى حد وواحده على اى حد يضايقنى انا شخصيا

ايه رايك فى الحب؟ ولمن تقول اجمل كلمه حب؟

الحب شئ لا ارادى – لبابا الله يرحمه لانه الوحيد اللى يستحقها

هل من السهل ان تمثل الحب لشخص يحبك لعدم جرح مشاعره؟

ممكن لكن الصعوبه فى الاستمرار ووقتها هيكون الجرح اشد

المراه فى نظر الرجل .......... أكمل ؟

الدنيا بجمالها وزينتها

الرجل فى نظر المراه.............أكمل؟

النصف الثانى لي راى تانى بس اخاف الرجاله يموتونى

ماهو اسعد خبر سمعته هذا العام؟ وماهو اتعس خبر؟

اسعد خبر :- كان حمل حنين القلب – اتعس خبر :- يووووووه دول كتير قوى ومش عايزه افتكرهم بصراحه

لمن تهدى التاج؟

حنين القلب (المدونه اتهجرت وبتشتكى من العونكوبوت) طبعااااااا اجبارى

فاتيما روح قلب ماما وروح قلبى انا شخصيا

ستيته اللى عارفه كل حاجه

وردشان روح الحب الصادق

شيما المشكومه من الحكومه

عيلاء الشاعر الحزين ايوه هو عيلاء مش مكتوبه غلط ولا حاجه

صبرنى يارب اهو بجملة الرغى ياصبصب

كيارا اللى هتطنش كالعاده ماانا عارفاكى (:

عادل اخويا علشان اشوف خفه دمه فى الردود بقى لانها وحشتنى جدا

سووووول

كرملله شاب فقرى

ايناس الاحزان يارب تعشق افراحها بقى

حاجات جوايا لانها بقت بتكتب قليل قوووى

واى حد يعجبه التاج فالدعوه عااااااااااااااااامه