شويه اكتشافات

البوست ده لاهو فصحى ولا عاميه

البوست ده شويه كلام والسلام خدوه على بعضه كده زى ماهو

لانى عايزاه يطلع منى كده زى ماهو وفى البوست ده شويه اكتشافات

اكتشفت ان كل الناس بلا استثناء وانا منهم لهم وشين وتلاته مش وش واحد

اكتشفت ان فى مدونات اصحابها بوشين بمعنى الكلمه وعندهم كذا مدونه وبينهم تناقض رهييييب دى شيزوفرينيا ولا ايه؟

اكتشفت ان حتى التدوين مش عالم مثالى زى اللى فى خيالى وان العالم اللى باحلم بيه هيفضل فى خيالى وبس

اكتشفت ان فى ناس طول ماهما بعيد ليهم بريق زى الماس ولما تقرب منهم تلاقيهم زجاج

اكتشفت انى مش بحب الشتاء غير فى حالات معينه وعلى شط البحر بس

اكتشفت انى باكون قويه قوى فى اوقات بيتوقع فيها من حولى انى ضعيفه

اكتشفت انى باكون ضعيفه قوى لما اكون فى حاله حب

اكتشفت انى شخصين عايشين فى جسد واحد

انا انسانه هاديه قوى وعصبيه قوى .. عاقله قوى ومتهوره قوى .. حنينه قوى وقاسيه قوى ..جدعه قوى وندله قوى .. شعله نشاط وقمه فى الكسل .. زكيه جدااااا واحيانا باكون غبيه جدا جدا

اكتشفت ان مش فى كل وقت بلاقى نفس الاهتمام من من حولى بقدر اهتمامى بهم وحجتهم الحياه ومشاغلها فبدأت ابعد عن الكل لا اراديا ومن غير ماافرق

اكتشفت انى مش باعرف قيمه الجواهر اللى فى حياتى غير لما تضيع منى .. ده غباء صح؟

اكتشفت انى مش باعرف اوزع اهتمامى على كل اصحابى بالتساوى وده بيضايقهم

اكتشفت ان النت وعالم التدوين اخدنى من دنيتى الحقيقيه ومن اصحابى اللى بحبهم لدرجه انى بطلت ازورهم

اكتشفت انى ساذجه جدا .. كلمه تودينى وكلمه تجيبنى .. لكنى مش غبيه وبافهم كويس قوى

اكتشفت انى عايشه بقيم ومفاهيم انقرضت من زمان واللى يسمعنى يقول عليه هبله

اكتشفت ان قلبى لسه بيدق وقادر يحس بكلمه حلوه طالعه بصدق :)

كفايا كده ولما اكتشف حاجه جديده هارجع اقولها لكم