هديتى لكم مره من نفسى ادبسكم

بقالكم فتره مرتاحين من وجع الدماغ والصداع والانقلاب اللى بيحصل فى البلوج بسبب التاجات

فجبت لكم تاج على الماشى كده واهو يكون نوع من الترويح عن النفس بدل الكأبه اللى غرقان فيها بلوجر واهله من فتره

نبدأ بسم الله ونقووووول أكشن

اسمك واسم مدونتك؟

دودو عاشقه الرومانسيه - مدونه نبضات قلب ولهان

احب الالوان؟ الايام؟ الارقام؟

الازرق بدرجاته – الجمعه علشان اجازه – الارقام الزوجيه

برجك وتاريخ ميلادك؟

القوس – 14 ديسمبر

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : هسيبها لكم انتم تحكموا فيها

العيوب: عصبيه جدااااا – متقلبه جداااااااا – عنيده جدا جداااااااا – ردود افعالى سريعه جدااااا

الصبر

ماهو مكانك المفضل؟

- البحر طبعاااااااااا

ايه هى هوايتك المفضله؟

كتابه الشعر والقراءه بس ده كان زمان (:

ما المقوله اللى تؤمن بها؟

لا تحسبن سرورا دائما ابدا **فمن سره زمن سائته ازمان

اجمل هديه قدمت لك من مين؟

مصحف من مُدرستى عبير عمر وعبله مجوهرات شيك جدا وعروسه من فاتيما

اسعد يوم فى حياتك؟ واتعس يوم فى حياتك؟

كل يوم عشته مع بابا واتكلمت معاه فيه كان يوم سعيد

اتعس يوم كان وفاه بابا

موقف طريف لا ينسى من ذاكرتك؟

ابقوا اسئلوا حنين القلب (موقف الصلصه) ده اللى انا فاكراه

معاك ثلاث وردات لمين تهديهم ؟

ليه الاحراج ده بقىىىىىى؟؟؟؟؟؟؟؟

واحده للمدونيين وواحده لاصحابى المقربين وواحده لزوج المستقبل بس يارب يكون يستاهل

معاك ثلاث رصاصات على من تطلقهم؟

واحده على اليهود وواحده على اى حد بيجرح فى اى حد وواحده على اى حد يضايقنى انا شخصيا

ايه رايك فى الحب؟ ولمن تقول اجمل كلمه حب؟

الحب شئ لا ارادى – لبابا الله يرحمه لانه الوحيد اللى يستحقها

هل من السهل ان تمثل الحب لشخص يحبك لعدم جرح مشاعره؟

ممكن لكن الصعوبه فى الاستمرار ووقتها هيكون الجرح اشد

المراه فى نظر الرجل .......... أكمل ؟

الدنيا بجمالها وزينتها

الرجل فى نظر المراه.............أكمل؟

النصف الثانى لي راى تانى بس اخاف الرجاله يموتونى

ماهو اسعد خبر سمعته هذا العام؟ وماهو اتعس خبر؟

اسعد خبر :- كان حمل حنين القلب – اتعس خبر :- يووووووه دول كتير قوى ومش عايزه افتكرهم بصراحه

لمن تهدى التاج؟

حنين القلب (المدونه اتهجرت وبتشتكى من العونكوبوت) طبعااااااا اجبارى

فاتيما روح قلب ماما وروح قلبى انا شخصيا

ستيته اللى عارفه كل حاجه

وردشان روح الحب الصادق

شيما المشكومه من الحكومه

عيلاء الشاعر الحزين ايوه هو عيلاء مش مكتوبه غلط ولا حاجه

صبرنى يارب اهو بجملة الرغى ياصبصب

كيارا اللى هتطنش كالعاده ماانا عارفاكى (:

عادل اخويا علشان اشوف خفه دمه فى الردود بقى لانها وحشتنى جدا

سووووول

كرملله شاب فقرى

ايناس الاحزان يارب تعشق افراحها بقى

حاجات جوايا لانها بقت بتكتب قليل قوووى

واى حد يعجبه التاج فالدعوه عااااااااااااااااامه

تهييس مشروع

انا عايزه ارغى معاكم كالعاده
ومش عارفه اقول ايه
يمكن لما ياتخنق قوى من الدنيا الحقيقيه باهرب لدنيتى معاكم
- هى حقيقه برضه بس احنا بنجملها-
فى ناس ممكن تحس من كتاباتى اللى اغلبها حزن انى انسانه كئيبه
وخاصه اللى مش يعرفنى كويس او اول مره يدخل مدونتى
بس فى الحقيقه انا بحب المرح والضحك جدااااااا
والنهارده انا جايه اسئلكم سؤال محدد وعايزه ارائكم
ازاى تغير حياتك ؟
محدش يقولى بطلى شرب سجاير لانى مش باشربها
انا باشرب شيشه تفاح (:
لا بجد بقى انا عايزه افكاركم ازاى اطلع من مود الاكتئاب الممل ده؟
بلاش اقتراح كملى دراستك لانى مش هانفذه للاسف لاسباب كتير جدا هاحتفظ بيها لنفسى
بلاش اقتراح الاشتراك فى جمعيات خيريه زى رساله لانى اشتركت فعلا فيها بس وقتى ضيق قوى علشان شغلى
ده حتى القراءه اللى كانت هويتى بقى عندى زهد فيها ومش باكمل فى اى كتاب اكتر من 5 صفحات

سمعاك ياالى بتقول روحى انتحرى وخلصينا وهاجيبك من قفاك

طبعا فى مواقف كتير فى حياتى معلقه ونوعا ما حسمتها ويمكن ده مسبب لى نوع من الراحه
محدش فاهم حاجه؟؟؟؟؟؟؟ مش مهم
يلا مستنيه اقتراحاتكم

كل حب وانتم طيبين

الفيديو ده من صنع ايدى
اه والنعمه تصدقوا (:

هو صحيح طلع عينى بس مش خساره فيكم ولا فى حبيبى
ويارب يعجبكم لانه اول تجربه ليا فى الموضوع ده

والاغنيه اللى فيه انا باعشقها وطبعا باهديها لكل احبابى وكل اصحابى

لان عيد الحب مش مقتصر على اتنين احباب وبس

الحب بيكون لكل اللى بنحبهم
وانا بحبكم كوووووووولكم
عيد حب سعيد علينا وعليكم يااااااارب

باحلم ومن حقى

من حقى احلم بدنيا كلها خير وسلام

من حقى احلم بناس بتحب بعض

من حقى احلم بان كل البشر طيبين

من حقى احلم بدنيتى انها جنه

من حقى احلم بالطيبه فى كل القلوب اللى باقابلها

من حقى احلم ان مفيش حد يجرحنى زى ماانا مش باجرح حد

من حقى احلم بان كل الناس تتمنى لبعضها الخير

من حقى احلم بحضن دافى فى حياتى

من حقى احلم بصديقه تفهمنى من غير مااتكلم وتحس بيا قووووووووى

من حقى احلم بقلب يحبنى .. يحتوينى .. يحترمنى

من حقى احلم بانسان يعمل لى اى شئ يسعدنى من غير ما اطلبه منه لانه هيكون اجمل كتييييييير

من حقى احلم بجزيره مفيهاش غيرى انا والبحر وحبيبى وابعد عن كل الدنيا واكتفى بيه هو بس

من حقى احلم بحضنه .. بلمسته .. بهمسته

من حقى احلم بيه وهو بيصحينى الصبح على ورده على خدى ولمسه حنان

من حقى احلم بيد تدفينى من برد الشتا وتكون نسمه لقلبى فى عز الصيف

من حقى احلم انى اكون ام .. نفسى قوى فى كلمه ماما لانى باعشق الاطفال

من حقى احلم ببيت ومملكه خاصه بيا انا لوحدى

من حقى احلم بانسان اثق فيه اكتر من نفسى

من حقى احلم بكيان يدوب فى كيانى

للدرجه دى بقت الاحلام صعبه وبعيده؟؟؟؟

ممكن..!!

ممكن ينزف قلبك اه

لكن تدمع عينك لا

ممكن حب يموت جواه

لكن قلب يحسك لا

ممكن جرحك يصرخ اه

لكن يد تساعدك لا

ممكن تعشق حزنك اه

لكن فرح يحبك ...لا

ممكن جرح يهدك اه.

لكن حب يهزك لا

ممكن يطول ليلك اه

لكن يخلص ويلك لا

ممكن تخنق قلبك اه

لكن ينتهى حبك لا

اعتذار

اعتذار لقلبى اللذى كانت ضلوعى قبر له

حنين عاشق

حنين بنوته جميله بس جمالها داخلى اكتر منه جمال ملامح ربنا وهبها جمال الروح .. هى عارفه قيمه نفسها كويس عارفه ان قلبها هو كنزها الوحيد بتحاول على قد ماتقدر انها تحافظ عليه من اى جرح عاشت تحلم بالحب وتتمنى انها تعيش قصه حب بكل تفاصيلها عارفه ان الحب حلم لذيذ وعارفه كمان انه بيوجع قوى لكن عايزه تجرب بنفسها .. جمعها قدرها بعاشق .. اه هو اسمه كده عاشق بدأت حكايتها معاه بمعرفه سطحيه واتطورت شويه واصبحت صداقه واتطورت اكتر واصبحت حب ولما صرح لها بمشاعره صدته كتير فى البدايه بس من جواها بتحلم بيه وهو اتمسك بيها اكتر وقرب منها اكتر واكتر .. ملك روحها وكيانها .. حبته قوى .. حكت له على كل اللى دار فى خيالها .. كلمته عن احلامها .. كانت بالنسبه له كتاب مفتوح .. فهمها قوى احتواها قوى لدرجه انه كان بيرد بالنيابه عنها فى اوقات كتير وقبل هى ما تفكر فى الرد .. كان اكبر احلامها انها تدفن راسها فى حضنه كان منتهى أمانيها انها تلمس ايده كانت بتملك الكون كله لو قال لها كلمه حب لكن كانت دايما تظهر له عكس ده بس هو عارف اللى جواها لانه فاهمها اكتر من نفسها واثق جدا من مشاعرها عارف انه قدر يملكها

بعدتهم الظروف .. افترقوا بس ارواحهم عمرها ما افترقت كان لهم اصدقاء مشتركين كانوا بيحسوا ببعض قوى وكانوا بيسئلوا عن بعض من بعيد لبعيد غابت حنين عن عاشق شهور ..كان ألمها كبير من فراقه وقلبها وجعها قوى لبُعده حاولت تعيش من غيره حاولت تتكيف مع وضعها الجديد ارتبطت بمُحب لكن الحقيقه اللى اكتشفتها ان قلبها مع عاشق .. هى رافضه مبدأ عيشه والسلام وعمرها ماحست مع مُحب باللى حسته مع عاشق رغم انها كانت بتحاول تقنع نفسها انه ده قدرها ولازم ترضى بيه مُحب مش عارف يفهمها مش قادر يحتويها مش عارف يحترم شخصيتها بدأت تقارن بينهم وبدأ صراعها مع نفسها وقلبها لاهى هتعرف تعيش مع مُحب ولا قادره ترجع لعاشق .. هى متاكده تماما ان مُحب بيحبها بجنون لكن مش قدر يحافظ على قلبها وضيعه بنفس الجنون ده وهى قلبها أغلى عندها من كل شئ فارقت مُحب بارادتها ........عاشق عرف وظهر تانى فى حياتها سلمت له من تانى وعبرت عن مشاعرها بشكل اقوى لانهم اكتشفوا ان بُعدهم عن بعض زود رصيد حبهم اكتر واكتر .. حنين عصبيه عاشق بيتحمل ..حنين عنيده عاشق متفاهم .. حنين بتحب عاشق متيم بيها دايما بيكمل شئ جوواها بيكون ناقصها هى مصدقاه عايزه تعيش معاه لحظه بلحظه بتحب كل تفاصيله ولزماته وكلماته بتحب كلمه باعشقك باتنفسك بحبك من شفايفه بتحب الحاله اللى بتهز كيانها لما يقولها لها .. حنين حست بضعفه قوى حبته اكتر حست باحتياجه ليها وكان نفسها تصرخ وتقوله انا كمان محتاجه لك لكن حيائها كالعاده منعها .. حنين اتوجعت كتير لكن لسه جواها حنين له .. حنين بتحاول ان قلبها يكون فى ايديها وتقدر تسيطر عليه

ياترى هتقدر؟ياترى هتكون لعاشق فى يوم من الايام؟ ولا هينتهى حلم زى ما ابتدى حلم؟

حنين سايبه نفسها لقدرها وبتتفرج على نفسها ودنيتها .. عاشق ظروفه صعبه مش قادر حتى يوعدها انه يكون لها

هتكون نهايتهم اجمل مع بعض ولا اجمل كذكرى؟

هل انكتب عليها يكون لها من اسمها نصيب؟

بنوته جميله كانت عايشه هنا ع البحر

كانت تحب الخير تكره كتير الشر

مش عايزه من دنيتها لا بيت كبير ولا قصر

تحلم تعيش جنه من غير خداع ولا غدر

جالها امير عاشق كلامه هو السحر

عطشانه لكلمه حب وغرامه هو النهر

رواها من احساسه وعشقه هو السر

كان حبها فى قلبها طارح جناين خُضر

كانت بتحلم بيه عاشق متيم حُر

كان منتهى حلمها تشاركه طول العمر

قول اللى فى نفسك

السلام عليكم ازيكم ازيكم انا جايه ارغى عندكم

عاملين ايه ياحبايبى ياحلوين وحشتونى جدااااا

ندخل فى الموضوع بقى

طبعا فى ناس منكم اعرفهم معرفه شخصيه وناس قابلتهم وجها لوجه

وناس اعرفهم من خلال الشات والايميلات بس

وناس تانين اعرفهم من خلال المدونه بس

ليه المقدمه دى كلها؟؟؟

ده سؤال وجيه

المقدمه دى علشان انا طالبه من اى حد يندرج تحت الصفات اللى فوق دى

انه يوجهه ليا كلمه او نصيحه او رأى

ماذا تقول لدودو عاشقه الرومانسيه؟؟؟

طبعا هانتفق على الصراحه بس من غير تجريح انتم عارفين مبدأى انا ضد التجريح

هافتح التعليقات للمجاهيل يعنى براحتكم خاااااااالص

يلا بقى سمعونى عايزين تقولوا لى ايه؟؟

قمه الديمقراطيه والله

(:

فى حضن بحر اسكندريه كان لقائنا

معلش بقى انا هاكتب من غير ترتيب لانى مهنجه على الاخر
النهارده كان اللقاء السكندرى الخيرى السبت 10-10-2009
اتجمعنا الساعه 10 صباحا لكن سبقتنا للملجأ صاحبه القلب الطيب
اللى مفيش حد بيقدر يسبقها فى خير ابدااا اختى الجميله فاتيما ام يوسف
واخويا الغالى اللمض قوى خالد همس الاحباب
وطبعا كانت معاهم هنوده قمر اسكندريه واحمد اسير الجراح المشاكس جدااااا
ووصلنا انا وحنين القلب لقيناهم فى انتظارنا
ومن الناس الجميله اللى حضرت بدراوى مدونه طعم البيوت
وضياء مدونه بيوتيفول مايند يارب يبقى صح الاسم
والقدر وانا وبنتها الجميله مرمر وابنها اللذيذ جدا اشرف صديقى الشقى بخفة دم
واحمد سعيد مدونه عنبر العقلاء
واسماء نبض الاسكندريه الجميله الرقيقه جدااااا
واعشق فى الليل ضوء القمر واخته الجميله صاحبه مدونه بحر الحياه
والجميله صاحبه مدونه نهر الحب واللى كانت عامله جو حلو قوى للقاعده النهارده
واسلام مواطن مصرى نايم
وحنان الشافعى مدونه رياح الحنين
والدكتوره داليا ماى كورنر
واحمد اسكندرانى فى الغربه
وانجى مدونه هات من الاخر
وريم مدونه بين ضفتى عقلى
وفاكهة القعده بقى عاااااااادل البلد دى فيها حكومه
وسووووووو عجوز وعندى 30 سنه
انتم بجد مشكله انت وعادل وكان نفسى اتكلم معاكم اكتر من كده بس تتعوض بإذن الله
والدكتوره لماااااضه اللى جت على الاخر خاالص واحنا ماشيين
كان نفسنا نقعد معاكى اطول وقت ممكن يالماضه لانك وحشانا قووووى

دول كانوا الناس اللى حضروا اما بقى احبابنا اللى كانوا معانا باصواتهم وارواحهم فمنهم
ستوته اللى عارفه كل حاجه وعامله مش عارفه
كيارااااا عالم مولان
ريم مدونه عين حماتى فيها عود سابقا و رسائل بلا بريد حاليا
صبرنى يارب رغى امراه غير مطحونه
ليدى احساس طفله مش عايزه تكبر
داليا قوس قزح
وايناس عاشقه الاحزان
المصريه
ايوشه صاحبه الاحاسيس والتخاريف
محاسن صابر عايزه اتطلق
مونى الشريف
احمد لا تشتاق
ماما ام مالك اللى كان كل الموجودين بيسئلوا عنها ربنا يعافيها يااااارب


من اجمل مافى اللقاء فعلا وكان مطلع صوتنا ومفرج علينا الخلق خالد همس الاحباب
واللى فشلت كل مخطاطاته للقضاء علينا انا وحنين القلب نياهاهاهاهاها
بعيييينك قعدين على قلبك ياابو همس (وش بيغيظك) وطبعا انا وخالد وحنين طووووووول النهار ماسكين فى بعض مشاكسات وجر فى شكل بعض وفاتيما شغاااااااااااله بس يابنااااات ..بس ياخاااالد........ بصراحه؟ صدعناها وطبعا خالد خسر المعركه اللى كان جاى اسكندريه علشانها وبالعكس كمان ده احنا اللى كسبنا وطبعا انت فااهم ممكن نعملوا فيك ايه هع هع هع

اما عن اليوم بقى
فقعدنا فى الملجأ من الساعه 10 الى الساعه 12 ونص تقريبا
وفاتيما ابدعت فعلا فى الاعمال الفنيه اللى عملتها للاولاد
ومنها الورود الجميله واللى مش نسيتنا منها كل واحد بوردته وباسمه حتى ابن حنين اخد ورده
جميله انتى يافاتيما مش بتنسى حد ابدا
وعملنا كمان لوحه فيها نجوم بتلمع ولزقناها مع الاطفال وكان شكلها فعلا تحفففففففه يابنتى انتى فنااااانه والله
واكلنا كلنا مصاصه ولبسنا تاجات من اللى فاتيما كانت عملاها وعشنا طفولتنا بحق الله النهارده
وفاتيما جابت لكل واحده فينا هديه جميله زى قلبها وعروسه حلوه جدا انا شخصيا فرحانه بيها قوووى اصلى عيله من الدرجه الاولى
والساعه 1 ظهرا كنا فى نادى المهندسين وقعدنا اتكلمنا وضحكنا كتير وبدأ كل احبابنا يتجمعوا
والساعه 4 تقريبا طلعنا كلنا على بحرى واتغدينا عند الزعيم وكانت القعده تحفففه على البحر وقدامنا مراكب الصيادين فى الانفوشى
وبعدها اتمشينا من الانفوشى لحد راس التين واتفرجنا على حلقه السمك وقعدنا عند الشيخ وفيق واكلنا اجمل رز باللبن بالايس كريم والمكسرات وبعدها نزلنا على الرمله وقلعنا الشوزات ولعبنا شويه مع البحر وضحكنا وغنينا وهزرنا واستمتعنا بجد
وودعنا احبابنا واحنا كلنا شوق ليوم جديد زى ده يتحسب فعلا من ايام عمرنا السعيده

فى انتظاركم وباحلم باليوم اللى تكرروا فيه اللقاء ده تانى
بس هنراعى المره الجايه ان اليوم من اوله لاخره قدام البحر بسسسسسسس
بناء على طلب فاتيما حبيبتى

أخر كلام

ان شاء الله ياجماعه ده بوست مفصل بكل تفاصيل لقائنا السكندرى الخيرى اللى هيكون يوم السبت 10/10

ان شاء الله التجمع هيكون امام الملجأ من الساعه 10 الى الساعه 10 ونص

والناس الموجوده هتدخل واللى يجى متاخر يتصل بينا نطلع ناخده

وده رقم تليفون التجمع 0193139198

اسم و عنوان الملجأ

دار الحنان طريق مطار النزهه بجوار الامن المركزى

بالنسبه للناس اللى هتيجى من محطه مصر بالقطار ممكن تاكسى او تركب ميكروباص الساعه وتنزل عند الملجأ

واللى هيجوا بالسوبر جيت من الموقف الجديد ممكن تاكسى برضه او يركبوا عوايد سريع وينزلوا فى السكه

وفى الحالتين مش بعيد وده توفيرا فى الوقت علشان نلحق نقعد سوى

ومش تقلقوا اللى هيتوه هاجى انقذه ههههههههههههه

هنقعد مع الاطفال فى الدار من الساعه 10 ونص الى الساعه 1

الساعه 1ونص هنتحرك على نادى المهندسين فى سابا باشا على البحر

واللى هيتاخر لاى سبب ممكن يجى لنا على هناك

اما عن طلبات الملجأ فهى كالاتى

اداوات نظافة

*********

*شامبو جونسون \ ديتول \شاور جونسون \صابون جونسون \زيت جونسون

لوشن جونسون \بودرة بيبى جونسون \ليف حمام \ليف عادى \بيرسول \صابون وجه \فنيك \ مناديل

مواد غذائية

********

* لبن نيدو \بسكويت \لحمه مفرومه \أرز \سمن حلوب \زيت \فراخ \بقسماط \زبادى \فاكهه \سكر \صلصه

أدوية

*****

* سرنجات 3سم \ اوجمنين شراب \ بارامول شراب \ ريكتوبلكسيل شراب \ ريكتو بلكسيل لبوس \ سيتافلون مطهر

\ساين أب \ ميجافين \ كيناكومب مرهم \ شاش \ قطن \ميكوفللين شراب \ سيتال مطهر \ فينادروبس نقط \

درمازين حروق \ أكوافيرا \ رينوستوب \ موتينورم شراب \ موتينورم لبوس

واللى مش عايز يشترى حاجه .. الملجأ بيقبل تبرعات نقديه وبيتم تسليم ايصال للمتبرع بالمبلغ

وبالنسبه لاى حد عايز يشاركنا من القاهره ومش هيقدر يجى

فيقدر يسلم المبلغ اللى هيشترك معانا بيه لاستاذ خالد همس الاحباب وده رقم تليفونه 0101345140

والدعوه عاااااااااااااااامه .. وفى انتظاركم مجموعه كبيره من مدونين الاسكندريه

واى استفسار انا معاكم فى صفحه التعليقات وهارد عليكم باذن الله

على الهامش

اللهم اجعل اعمالنا خالصه ولوجهك الكريم صادقه

ولا تجعل لاحد فى شئ ولا للشيطان منها نصيب

وتقبلها منا بقبول حسن على الوجه اللذى يرضيك عنا

امييييييين