( هديه مرات اخويا حبيبتى ام رودينا )

النهارده يوم مختلف قوى عن باقى السنه
النهارده حسيت ان قلوب كتير بتلف حواليا من كل ناحيه وتحضنى قوى وتطبطب على وجعى قوى
النهارده حسيت ان فى ناس فعلا بتحبنى من غير هدف ولا مصلحه
حب كده لله وفى الله .. حب علشان القلوب دى مش بتعرف غير الحب وبس
انا مديونه لكم النهارده بسعادتى كل تعليق فى المدونات على بوستات تخصنى
كل مكالمه وكل رساله وكل تهنئه ولو فى بنر جانبى فى مدونه فهو بجد فرحنى قوى
كل الناس الجميله اللى نزلت لى بوستات بيعبروا لى فيها عن حبهم اللى هو بجد كتير عليا قوى
كل هديه جاتنى النهارده من قلوب زى الدهب بجد فرحتنى
الف مليون كلمه شكر مش هتوفيكم حقكم ابدااااااااا
بس انا دايما فخوره انى منكم وبجد التدوين واهله هما محور حياتى حتى لو بعدت شويه عنهم
ومعظم كلامى عنكم مع اصحابى وزمايلى فى الشغل
حتى اللى مش له فى النت خالص اصبح بيتمنى انه يتعرف عليكم من خلال كلامى
ومن نظره الفخر اللى بيشوفوها فى عينيه وانا باحكى عن اى موقف مر مع اى حد من اخواتى واخوانى المدونين

شكر خاص لاصحاب البوستات

كيارا عالم مولان .... كل سنه وانتى منوره الدنيا
شكرا على البوست وهديتك الجميله وصلت ياكيكى ربنا ما يحرمنى من حنانك ابدا

بابا هانى نط فى الكوز ... دودو كل سنه وانتى طيبه
شكرا يابابا على البوست وعلى المكالمه وعلى كلامنا فى البؤجه وعلى كل لحظه عرفتك فيها

سونى 2000 .....الى دودو عاشقه الرومانسيه وكلام مهم
اول مره اقابلك وكأنى اعرفك عمرى كله وحبيتك قوى
شكرا على تعبك فى البوست وياريت مش تقفلى مدونتك والغيبه مش تطول
بيت المدونين ......كل سنه وانتى طيبه يادودووووووو
شكرا لايمان الحب الجميل على تنسيق البوست وكل فرد فى بيت المدونين ساهم فى البوست ولو بتعليق

وشكر خاص جدا جدا جدا لمصدر سعادتى فى الدنيا
حنين القلب ام عمر كلامى عنك مش هيكفيه العمر كله حكايات عنك وعن جدعنتك معايا
والدكتوره ستيته انتى اللى قلبك ألماظ حر ياست الستات ومكالمتك ليا اسعتدتنى جدااااااااااااااااا
واختى حبيبتى فاتيما كل كلمه منك بتخلينى اطير فوق السحاب
واهتمامك بيا بجد كتير على قلبى الضعيف ده مش هقدر اتحمل كل الحب ده جواه يابطه
وشكر كبير جدا لاخف دم فى اسكندريه قلب قطه وحبيبه قلبى ايمان الحب الجميل انتم اجدع ستات اسكندرانيه عرفتها فى حياتى
وشكر خاص لنورا خيخه واى كلام على اهتمامها وتهنئتها
وشكر خاص لاختى لولو صيدلانيه طالعه نازله على اهتمامها انا مواليد 14 ديسمبر يالولو مش 13 والله
وشكر لرمز الجدعنه فى قاهره المعز خالد ابو همس الف شكر على رسالتك واهتمامك ياابو همس
اما بقى الكوم الكبير قووووى فهما اتنين من اخوانى المدونين مهما اعمل مش هقدر اوفيهم حقهم ابدا
احمد اسير الجراح الف شكر ياابو حميد على الهديه الرقيقه اللى اصريت انك تيجى بنفسك تقدمهالى
ومحمد التركى يااسكندرانى يااجدع خلق الله شكرا على اهتمامك بيا ياابن منطقتى

سعيده بيكم ومعاكم وفخوره انى منكم يااجمل قلوب خلقها ربنا

على اى حال الدنيا ماشيه

احلامى لسه فى قلبى عايشه

زى الغريق ماسك فى قشه

عصفور ضعيف نايم ف عشه

والغدر دايما رصاصه طايشه

قلبى الرقيق عمره ماخان

لكن كتير فى حياته غشه

محتاجه انسان يحسنى بصدق ..يعشقنى بجنون ..يحبنى لذاتى

محتاجه صديق يسمع شكوتى وينسانى بعدها ولا كأننا اتقابلنا

محتاجه اغسل همومى بدموعى اللى اصبحت نادره ومش لقياها

محتاجه لك من بين الاف الرجال تمسح وجعى وتزرع الفرحه فى ايامى

محتاجه كل كلمه حب باسمعها منهم تكون بشفايفك انت.. باحساسك انت.. بقلبك انت

محتاجه اصدق نفسى لما باتمنى لك السعاده مع غيرى

ومحتاجه اكتر اصدق انك بالنسبه لى مجرد صديق

محتاجه حضن دافى يحمينى من بروده الدنيا

محتاجه اغيرافكارى واتنازل عن مثاليتى الخايبه فى زمن المصالح واتعلم بقى اقول يلا نفسى

محتاجه اغير قلبى علشان يبطل يوجعنى من قسوه الناس والدنيا

محتاجه اعيش دور الجانيه لانى تعبت من دور المجنى عليها فى تمثيليه سخيفه اسمها حياتى

محتاجه اكون اقوى بنفسى وابطل اعيش بالناس

محتاجه ابطل ابص للماضى على انه كل حاجه فأضيع منى الحاضر واخاف من المستقبل

محتاجه اعيش سنى وافرح واضحك من قلبى بجد

محتاجه ارجع نفسى لنفسى لانى بالشكل ده غريبه عنى قوى و اصعب انواع الغربه ..الغربه جوا النفس

امتى احس انى مش محتاجه حاجه؟؟؟!!!

قضت عمرها كله فى حلم حتى انصدمت احلامها فى صخرة الواقع

صوت بداخلها ينادى يجب ان تستيقظى من حلمك الان فالحياه تختلف كثيرا عن الاحلام

يصر من حولها على ايقاظها ولكن باسلوب مؤلم لروحها واحساسها المرهف

عقلها يرفض بشده مجرد الفكره ان تحيا دون حلم ..

هل الموت الان افضل؟؟؟

شئ بداخلها يجيب انتى بالفعل الان ميته فلا فرق بين موتك او قتلهم لكى

لا يشعر احد بوجعها سواه .. فاين هو الان ؟؟؟

هل فارقتها روحها معه فى طريق اللاعوده والان هى تحيا معهم بجسدها فقط؟؟؟!!!!

اااااااااااااه ... كم تشتاق اليه .. كم تحتاج له الان

بحثت كثيرا فيمن حولها لتجد شخص واحد يؤتمن على احساسها بعده.. فلم تجد

هى تحتاجه الان بشده فلطالما اتخدوا القرارات المصيريه سويا

تسترجع كلامهم لها

اين رجاحة عقلك اللتى كان يثق بها .. اعتمدى على نفسك واتخذى قرارك

الان هى تصارع موج الحياه وحدها

إما نجاه وإما غرق

إما موت او حياه تساوى الموت

تنظر لصورته وتبكى بشده

أاااااااه يا أبى لو تعلم مدى الفراغ اللذى خلفته ورائك

عيونك خطفونى
من نفسى سرقونى
وف لحظه اسرونى
ولحيرتى نسونى
احزانى وشجونى
عنيك عجبونى
(;

عيدكم سعيد بلاش مبارك

التحديث :-
اجمل عيديه جاتنى فى العيد
معناها عندى كبير قوى
ميرسى يابطتى

هنا اسكندريه
هنا اسكندرية عجيبة الفنار
ومن بين عيونك قابلت النهار
و حبك فى قلبى مكنش اختيار
وليكى ف قلوب البشر صولجان
هنا اسكندريه
هنا اسكندرية المطر والدفا
هنا اسكندرية بحور الوفا
هواكى ولقاكى لقلبى شفا
دا قلبى اللى سحرك ملاه بالحنان
هنا اسكندريه
هنا الفرح ويا الدموع والأنين
بتشبك ما بينهم خطاوى السنين
وتروى فى شوارعك قلوب مشتاقين
يقابلوكى بكره فى نفس المكان
هنا اسكندريه
هنا اسكندرية المندره والعامود
هنا اسكندرية النضال الصمود
هنا شط بحرى وقهوة قاعود
هنا الصهبجيه و سهرة زمان
هنا اسكندريه
هنا اسكندرية الإمام البوصيرى
وخيرها عليا أنا ويا غيرى
يا بلدى اللى عايشه فى قلبى وضميرى
وفرحة شبابى وعمرى اللى كان
هنا اسكندريه
هنا اسكندريه … هنا باكوس
بساطه وألاطه وعزة نفوس
قلوب بالكرامه بتقدر تدوس
على من يحاول يهز الكيان
هنا اسكندرية
هنا المكس والهجس والدردشه
هنا الضحك واللعب والفرفشه
هنا العشق والأنس والدروشه
وجرس الكنيسه وصوت الأذان
هنا اسكندريه
هنا اسكندرية .. هنا الجدعنه
وناسها اللى عاشق خيالهم أنا
حضاره ومهاره وفن وغنا
وسيد وبيرم وغيرهم كمان
هنا اسكندريه
هنا اسكندريه بحور صيادين
وخضره وميه وعرق فلاحين
وناس ماشيه تبكى وناس مبسوطين
ودايبين فى حبك … وحبك جنان
هنا اسكندريه
هنا المنتزه ويا رشدى وجليم
هنا التلمذه جنب غنوة حليم
هنا القلعه حاضنه الفنار العظيم
مع المينا شرق اللى شاهد عيان
هنا اسكندريه
هنا اسكندرية حلاوة وداد
وشوق الصبيه ولهفة معاد
وشارع صفيه بيحضن فؤاد
ويحكيله كل التاريخ اللى كان

ازيكم يااجمل اصحاب واهل فى الكون كله وحشتونى موت كل سنه وانتم طيبين وعيد سعيد عليكم يارب
انا حبيت ابدأ كلامى بقصيده لفنان رائع بجد اكتشاف ليا اسمه محمد يوسف وده لينك القصيده الاصليه عنده لانى اختصرت فيها شويه
وده كان اولا
ثانيا والمهم انى النهارده جايه اعلن عن لقاء سكندرى جديد ويوم رائع من ايامنا الحلوه مع بعض
الميعاد 2 اكتوبر 2010 اه لسه شهر كامل بس علشان كل واحد يجهز نفسه من دلوقتى ويعمل حسابه
ان شاء الله اليوم مش هيقل روعه عن اللقاء اللى فات واللى حضروا هيفهموا قصدى اكيد وده وعد منى باذن الله
وعلشان التشويق هاقول اننا هنركبوا مراجيح زى المره اللى فاتت بس هنروح بدرى شويه علشان تلحقوا تعيشوا طفولتكم
وكمان هنروح متحف المجوهرات الملكيه واللى كتير مش يعرفوه وده بناء على طلب ام يوسف واحلام حضرتك اوامر يافندم
وهنتغدى فى بحرى ونحلى عند الشيخ وفيق يعنى عايزاكم تيجوا صايمين قبلها بشهر بمعنى ان رمضان مواصل معاكم لحد ما اشوفكم
ده غير ان عندنا مناسبه حلوه هنعلن عنها فى اللقاء ودى هتكون مفاجئه اليوم
طبعا بنات اسكندريه معايا فى التجهيزات وهاتصل بيهم نفرايه نفرايه مش محتاجين عزومه
وقبل الميعاد بشويه هنزل بوست بكل التفاصيل والمكان اللى هنتجمع فيه ورقم التليفون وكل حاجه
هتوحشونى لحد ما اشوفكم قووووووى

رجعت لكم تانى يااحلى ناس عاشرتهم
رجعت لانى فرحانه جدا
رجعت لان فرحتى من غيركم اكيد ناقصها حاجه مهمه قوى
سبب الفرحه اكيييد معروف لانكم بتنتظروه معايا من 9 شهور
النهارده نورت دنيتى وصول ضيفه طول عمرى بانتظرها
الانسه رودينا
بنت اخويا حبيبى واللى حصلت بسببها على لقب عمتو رسممممى
ومعنى الاسم بناء على طلب الجماهير هو
سيف من سيوف الرسول (صلى)
كانت بنت تصنع السيف كانت اسمها رودينا
فسموا السيف السيف الرودينى

بنوته شبه رودينا مووووت انما مش هى اكيد (:

اتفضلوا الشربات

ولعشاق المغات وانا اولهم ... اى خدمه

والشيكولاته كماااااااان

ودى شموع السبوع اختاروا اللى يعجبكم

وطبعا انسب هديه فى الوقت الحالى هو البامبرز ((:

خلاص احتفلنا وشربنا المغات وفرحنا ؟؟ نتكلم جد
النهارده فعلا من اجمل ايام عمرى بجد
النهارده حسيت باحاسيس غريبه قوووووى
جربت دموع الفرح بجد اللى كانت دموع قلق على ام رودينا والحمد لله ربنا سلم
النهارده كنت حاسه ان قلبى ارق من كف ايد رودينا لدرجه انها كل ما تبكى ابكى معاها
النهارده اخدت حماده اخويا فى حضنى وبكينا وضحكنا وفرحنا... بجد احساس لايوصف فى اللحظه دى
النهارده سمعت صوت ناس بحبهم وشاركتهم فرحتى زى
ستيته الف مبروك لمنوسه النجاح ياستوته ولو انها متاخره
وفاتيما باشكرك جدا على اهتمامك الغير عادى بيا يابطه وعقبال ما ربنا يرد لك يوسف وتكون دى فرحتنا الكبيره بجد
وقلب القطه انتى بنت بلد بمعنى الكلمه يامارو ربنا يخليكى لينا ياااارب ومنتظراكى فى السبوع ياقمر علشان نولعها بقى ياوديع
واحمد اسير الجراح اخويا الاسكندرانى الجدع قوى حسيت بفرحتك فى صوتك بجد النهارده يااحمد عقبال ما نفرح بيك يااارب
وطبعا اللى مش هاقدر اوفيها حقها ابدااااااا حنين القلب ام عمر دى بقى كانت معانا من اول اليوم لاخره وتعبناها جدااااااااا
يلا فدايا وعقبال ما تفرحى بيا انا كمان ياحنونه واطلع عينك انا وعيالى ياااااااااارب
حنين طبعا عامله حسابها انها هتقرى فاتحه عمر على رودينا النهارده وانا بصراحه لما لقيت ان البنوته حلوه قلت لها رجعنا فى كلامنا
مفيش بنات للجوااااز الا اذا العيال حبوا بعض ساعتها مش هاقدر اتكلمممممم (:
الاتنين عيالى

اخر الكلام
انا فرحاااااااااانه قوووووووى قووووووووووووى

المرسل اليه :- حبيبى

الرساله :- الف مبروك ياحلم عمرى اللى ضاع

المرسل :- بقايا انسانه

الى ستوته
احسنتى الاختيار يادكتوره ستيته وابهرتينى بالشاعر هشام الجخ وانا باعشق اللون ده من الشعر
ولقيت نفسى قوى فى قصيده ايزيس
الف شكر لحضرتك على كميه السعاده والاستمتاع اللى حستهم وانا باسمع كلمات الشاعر الفنان ده
احساس بجد كنت محتاجه له انى استمتع بشئ يكون له معنى عندى

ابنى كان شاب طيب ومحبوب من كل الناس عمرى ما شفت حد زعلان منه روحه حلوه مالى علينا البيت ضحك وحب .. حب لاخواته واحترام ليا ولابوه .. ابنى كان جدع قوى مع اصحابه .. ابنى كان شاب مكافح بيشتغل وعنده مكتب استيراد وتصدير عمله مع اصحابه وبيكسب رزقه بعرقه .. عمره ما ضايقنى انا ولا ابوه ولا حملنا فوق طاقتنا .. اعتمد على نفسه وبنى نفسه بنفسه .. ابنى كان قاعد فى حضنى امبارح بيضحك ويحلم ببنت الجيران اللى بيحبها ونفسه يخطبها وبيحكى لى على اولاده اللى هيديهم لى اربيهم زى ما ربيته هو واخواته .. ابنى كان بيتفرج معايا على التليفزيون وسهران معايا انا وابوه واخواته ونايم فى حجرى .. ابنى كان بيقولى انه مهما كبر بيحب قوى يحس انه لسه طفل بين ايديا وانه بينسى تعب الدنيا والجرى ورا لقمه العيش لما اخده فى حضنى .. ابنى كان بيسمع شكوة اخته امبارح وبيطبطب عليها وكان بيوعد اخوه الصغير بهديه حلوه لما ينجح .. ابنى ده كان نور عينى اللى ربنا كرمنى بيه وقلت ان الايام عوضت صبرى خير .. ابنى كانت اى ام بتتمنى اولادها يبقوا زيه فى اخلاقه وحب الناس له .. نزل خالد من البيت وسلم على ابوه وباس ايدى وطلب منى انى ادعى له نزل بعد يوم مرهق فى شغله يغير جو ويسهر مع اصحابه شويه ... دخل سيبر يفرج عن نفسه ماهو تعبان ياحبيبى طول اليوم ..وضحك وهزر مع اصحابه من قلبه .. ودخل عليهم البوليس يفتشهم .. والله ابنى كان محترم ومش بتاع مشاكل .. بس كان متربى على عزه النفس وان كرامته فوق كل شئ ومش بيقبل بالاهانه ابدا .. ابنى ماعملش حاجه والله ..هو بس سئل رجال الشرطه احنا بنتفتش ليه؟؟؟!!! وكان مصيره الضرب حتى الموت .. اه مات ابنى .. مات ابن عمرى .. مات حته من قلبى .. مكنتش اعرف ياابنى انى مش هاشوفك تانى ... ااااااااااه ياخالد لو كنت شفتهم ياابنى كنت نهشتهم باسنانى ولا انهم يمسوك بسوء ياحبيبى ... سامحنى ياابنى لانى ربيتك على الاخلاق .. سامحنى ياابنى لانى طلعتك محترم فى بلد مش بيعيش فيها الا البلطجيه ... حسبى الله ونعم الوكيل .. حسبى الله ونعم الوكيل ... تارك عند اللى خلقك يابنى مفيش فى ايدى شئ الا دموعى ياحبيبى .. سامحنى ياخالد .. سامحنى ياابنى

ياترى كام خالد فيكى يابلد؟؟؟؟؟؟؟؟؟؟؟؟؟؟؟

**الصمت اجابه بارعه لا يتقنها الكثيرون

**اذا كان الكلام من فضه فالسكوت من ذهب

**اوقات كتير يكون الصمت هو افضل الحلول المتاحه

لما يجرحك حبيب ومش يحس مدى ألمه فيك فنصيحه .... اسكت

لما يخونك صديق وتخاف ان كلامك له يجرحه يبقى الافضل ... تسكت

لما يبعد عنك انسان غالى عليك والدنيا تشغله عنك يبقى الافضل .... تسكت

لما اللى كان بيفهمك من نظره عينك يبطل يفهمك يبقى الافضل ..... تسكت

لما حبيبك يعتبرك مجرد تجربه وفشلت يبقى الافضل ... تسكت

لما قلبك واحساسك يكونوا ارخص من التراب عند ناس كانوا عندك اغلى من الماس يبقى .... أسكت

لما تعصر قلبك علشان تسعد حد بتحبه ومش يقدراحساسك يبقى الافضل .... تسكت

لما تحس ان اللى بتحبهم بيستنزفوا دمك واعصابك بأسم الحب يبقى الافضل ... تسكت

لما اللى بتديهم حبك واهتمامك وتفكيرك يعتبروا ان ده حق مكتسب لهم .... اسكت

اكيد لو الكلام هيرجع شئ كنت هاقولك اتكلم يبقى افضل حل انك تسكت

علمتنى الايام ان لا احد يساوى دمعة عين .. قطره عرق .. اهة قلب

انيس منصور

(والله عنده حق)

اضغط علي مشاعرى بكل ما اوتيت من قوه ...لا تبالى باحساسى ...لا تهتم بذلك القلب الذى اتاك يتسول منك الحب ذات يوم فاطعمته حبك من باب العطف فقط .. ذلك القلب الذى وضعته فوق مقصله حبك واستمتعت بتقطيعه ... واليوم تسئل عن حاله بتاثر شديد وكانك لم تكن سبب فى موته ... لا تسئل عن دموعى اللتى تملأ اجفانى فهى لاتعنيك فى شئ اتركها تنهمر من عينى فتطفئ نار قلبى

وانا ايضا لن اسألك لماذا كذبت علي ؟ لماذا اصتنعت الحب ؟ لماذا وعدتنى بجنه احياها فى حبك ؟ نعم بيننا كثير من الوعود فكلمه احبك وعد ..... احلامك معى بمستقبل قريب وعد ... نظره عينيك وعد ... هل اشفقت على قلبى من ان ينجرح ؟؟؟!!! لو سئلتنى لاخترت بعادك مع حبك افضل لى من ان احيا على امل واراه ينهار امام عينى فانا من البدايه اعرف ان نهايتى معك لا مفر منها وطريقنا مختلف لن اجرحك بكلامى فافضل لى ان اموت فى صمت على ان تزعجك صرخات قلبى ولكن اسمح لى ان افاجئك بما لم تتوقعه يوما فانا اعرف منذ البدايه ان قلبك لم يهوانى ابدا ولكنى كنت اكذب نفسى لانى اريد ان اصدق كلامك واخرس صوت عقلى لانى اريد ان اسمع وعودك الكاذبه لا تندهش من علمى المسبق بخداعك ولكنه الاحساس اللذى تفتقر انت اليه احساسى اللذى لم يخوننى ابدااااااااااااا اعتذر اليك بشده ان كانت بعض كلماتى بها قدر ولو ضئيل من التجريح فانا لا اريد ان ينجرح فؤادك ابدا انا فقط اريدك ان تستمتع انت بجرح من حولك حزنى ليس عليك او منك انما حزنى على نفسى فدعنى ارحل عنك فى صمت لعلى اجد ما ضاع منى فى هواك

كل مره بقابلكم بتوحشونى اكتر واكتر فرحانه بصحبتكم وفخوره انى منكم
واكتمالا لبحر السعاده اللى قلبى غرقان فيه يشرفنى ادعوكم لزياره اسكندريه بلدى ومعشوقتى الاولى
اللقاء هيكون يوم 29 مايو 2010 والميعاد الساعه 10 صباحا والمكان قلعة قايتباى
وده رقم ابو همس لاى استفسار 0101345140
وبرنامج الزياره زى ما قال خالد وانا موافقه عليه جداااااااا اليوم فعلا هيكون ترفيهى كل شئ موجود
مراجيح ماشى - مركب فى البحر مش هيضر - لعب فى الرمله عااااااادى - غداء وايس كريم ومصاصات وبلونات
وزياره للشيخ وفيق كمااااان "ده بتاع ايس كريم ياجدعان مش مقام ولا حاجه "
وطبعا وقبل اى شئ احنا راعينا طلبات الست ام يوسف
وطلباتها اوااامر ... فى اخر لقاء قالت انها نفسها اللقاء الجاى يكون على البحر طول النهار واحنا بنقول لها حضرتك تحلمى واحنا ننفذ ياأم يوسف احنا عندنا كاااام بطه؟؟؟
وانا متاكده انه هيكون يوم جميل باذن الله لاننا
هنتعرف بناس جميله نورت عالم التدوين
وهنقابل ناس جميله نعرفها من خلال المدونات لاول مره
والاحباب اللى اتعرفنا عليهم قبل كده هنشوفهم تانى
الدعوه مفتوووووووووووحه لكل مدونين مصر ياجدعان
هتوحشونى قوى باقى من الوقت 8 ايام
مش عايزين كسل وفى انتظاركم انا وحنين القلب وقبلنا الاستاذ عمر ابننا

من يهمهم الامر

حنين القلب : لقاء اسكندريه
همس الاحباب : تفاصيل لقاء اسكندريه

المناسبات

هنبدأ بالمناسبات الحلوه وهقول اولا وقبل اى شئ رسائل موجهه لاصحاب المناسبات دى

فاتيما15 مايو : بحبك والله ماعارفه اقول ولا اعمل غير انى احبك كل سنه وانتى طيبه يابطه

ريم 15 مايو: ارق الرقيقات على رأى فاتيما (: كل سنه وانتى طيبه ياام كنزى
داليا قوس قزح 11 مايو : الانسان مش بيعرف قيمه حد الا لما يبعد فعلا كل سنه وانتى طيبه ياالوان الطيف الجميله
محاسن صابر26 مايو : غيبتك طالت علينا ياام بيرو قوى بس انتى دايما فى قلبى وبالى كل سنه وانتى طيبه ياقمر
زهراء 28 مايو : كل سنه وانتى طيبه يازهره .. نفسى اشوفك بقى .. ينفع اولاد المنطقه مش يشوفوا بعض؟ منتظراكى فى اللقاء
وليد الدوغرى هى وظروفها : انا قابلتك مره واحده لكن بجد انت انسان محترم وتستحق كل الاحترام الف مبروك على الخطوبه ربنا يسعد قلبك ياوليد

الاعلان

حددنا لقاء الاسكندريه باذن الله يوم 29 مايو يعنى اخر الشهر وفى وقت الكل يرتب حاله نفسى اشوفكم كووولكم وباذن الله هنبقى ننزل بوست بتفاصيل اليوم ومكان اللقاء تحديدا وباذن الله عايزه اعرف مين جاى لان فى مفاجئات حلوه كتير اليوم ده وطلبات هنحاول ننفذها وباذن الله هيكون يوم مميز زى كل ايامكم الحلوه

اختكم دودو

لم اتخيل يوم ان اكون قريبه منك الى هذا الحد

انت اقرب لى من روحى التى تسكن جسدى

انت اقرب لى من دقات قلبى لقلبى

انت اقرب لى من قلبى لضلوعى

انت اقرب لى من النور الذى يسكن عيونى

اعشقك كما اعشق غروب الشمس بل اكثر .. فحبك ياأميرى شمس بلا غروب

احبك اكثر من القمر فى السماء غير ان حبك ياسيدى قمر لا يرحل عن ليلي

وكأنى ياسيدى عصفور ضعيف كاد ان يهلك عطشا

فوجد فى كفيك نبع صافى لماء عذب اعاد له الحياه

فحين كاد ان يهلك قلبى وجدت الحب فى قلبك فشربت منه حتى ارتويت

سار حبك فى مجرى حياتى بعد ان جف فاعاد الحياه لكل شئ حوله

اصبح كل شئ فى عينى جميل وذات معنى

اصبحت صحراء عمرى ربوع خضراء مليئه بالازهار

اثمرت اشجار حياتى باشهى واطيب الثمار ولا تتمنى يد سواك لتقطف منها ثمارها

الاف كلمات الشكر لا توفيك حقك ابدا على تلك السعاده اللتى اعيشها بقربك

فأنا لا املك الا قلبى ياسيدى فهل يكفى؟

اعشقك حد الجنون

اراك اينما اكون

اخطو بحبك فوق الظنون

لان قلبى بحبك مفتون

اهواك اكثر مما يتخيلون

اذا كان الفراق اختيارى

فهل استطيع ان اكمل للنهايه قرارى؟

ايمكننى ان اغير فى درب هواك مسارى؟

ايمكن ان اكتب لغيرك اشعارى؟

هل تستطيع سوى مركبك خوض بحارى؟

هل يستطيع رجل سواك اختراق اسوارى؟

لا اتخيل سواك ياسيدى بجوارى

لا يد سواك تقطف ازهارى

لا يروى ظمأ قلبك الا انهارى

لا ليل الا ليلك تشرق فيه اقمارى

ولكن ساعدنى ياسيدى كى ارحل عن عالمك واتخذ قرارى

كل ذره فى كيانى دايبه من حبى ليك

كل احساس ملانى ياحبيبى عشان عنيك

لو تطلب منى الروح ياحبيبى بروحى افديك

لوعايز نجم السما يكون مابين ايديك

لو قلت حياتى انا ياحبيبى قليله عليك

قمرى فى سمايا انا بيعشق سهر لياليك

حنان الكون ده كله فى لمسه من ايديك

كل الامان ياعمرى فى نظره من عنيك

كل كلام العشاق لو يخلص ما يوفيك

شيفاك نجم فى سمايا

شيفاك كلمه ف غنايا

شيفاك فارس آسرنى

شيفاك قمر ساحرنى

شيفاك ورده فى كفوفى

شيفاك فى عيونى خوفى

شيفاك سهرى الليالى

شيفاك فى عيونى غالى

شيفاك نهر بيروينى

شيفاك كلمه بتحيينى

شيفاك همسه فى كلامى

شيفاك فى حياتى غرامى