زى النهارده 15 يناير من كل سنه بيوافق عيد ميلادك
بقالى 3 سنين مش باحتفل بيه لانك غايب عنى
لكن بافتكرك انا واخويا وماما ودايما بندعى لك
تعرف انك واحشنى قوى؟
اكيد عارف ... لانك جيت لى امبارح فى الحلم
وخلتنى اشوفك كان شكلك حلو قوى وملامح وشك صافيه قوى
وكالعاده كنت بتدافع عنى لانك انت الوحيد اللى فاهمنى
وانا اشتكيت لك كتير منه ومن قسوته عليا وقد ايه انا اتحملته و ازاى باعنى وكنت بابكى بانهيار
وكانك كنت مسافر ورجعت لى ... ياااااااااااااااااه لو حلمى يتحقق وتكون مسافر وترجع تانى
السنه دى زى السنتين اللى فاتوا مش هقدر اقول كل سنه وانت طيب لان الطريقه لازم تختلف
لكن هاقول الله يرحمك وانت مش محتاج يوم افتكرك فيه لانك على بالى كل يوم
بحبك لاخر نفس فى عمرى ياابويا
.jpg)
25 الرومانسيين اللى زى حالاتى:
احسست جدا بكلامك لانني مثلك لكن الفرق انني انا افتقده منذ 21 سنة اي عمر كامل لكن رغم مرور كل هذا الزمن مكانته في قلبي هي نفسها ان لم تكن أكثر افتقده بشدة اي موقف اتعرض له اقول ترى لو كان معي كيف كان سيكون الامر لكن امام قضاء الله لانملك الا التسليم والرضى
رحم الله والدك والهمكم الصبر والسلوان ورحم الله أبي وغفر له ذنبه ورحم الله جميع اموات المسلمين انه على كل شئ قدير وبالاجابة جدير
ربنا يرحمه
تعيشى وتفتكرى
اللهم اغفر له ما تقدم من ذنبه وما تاخر واسكنه فسيح جناته
تحياتى
حبيبتى دودو
ربنا يرحمه وتعيشى وتفتكرى
ناس بنحبهم وبنفقدهم فجأه
بس بيفضلو عايشين فى قلوبنا
وبنحبهم زى مابتقولى
لاخريوم فى العمر
الحمدلله على كل حال
الله يرحم والدك ويجعل مثواه الجنه امين
ويارب يصبرك يا حبيبت قلبي
كفايه اوى يادودو انه يكون فى قلبك وتدعى له ومسير ربنا يعوضك باحن حبيب واب وزوج وصديق دمتى فى احسن حال ديما يارب
تعيشي و تفتكري
وهو عايش فيكم اهو انت و ماماتك و اخوكي
الف مليون رحمه ع روح والدك
وربنا يجمعكم بيه ان شاء الله في الجنه
ولا يحرمك ابدا تاني من حد بتحبيه
دودو
-*-*-*
ربنا يرحم والدك ووالدى
اشعر بكلامك ومشاعرك لانى فقدت والدى منذ 20 عام اشعر اننى الى الان يتيمه رغم ان والدتى ربنا يكرمها عمتل عشانى كتير انا واخويا لكن بجد وجود الاب قى حياتنا شئ مهم
انتى عرفه يا دودو انى اتمنى لما اتجوز ان شاء الله زوجى يكون لى اب بجد يمكن يقدر يعوضنى عن مشاعر وحاجات كتير فقدتها منذ كنت طفله
ربنا يبارفك فيكى ويحفظ لكى والدتك يااااااااب
زهراء
ربنا يرحمه .. ويصبرك على اللى بيقابلك من غيره ..
خليكي جميلة وقوية عشان يبقي دايما مبسوط منك
وش واحدة مبتئسة مش عارفة تقولك ايه
ربنا يرحمه وتعيشوا وتفتكروه دايما
:( الله يرحمه يارب
انا كمان بحب بابا الله يرحمه اوى
يابختك ان باباكى جالك فى الحلم
ان شاء الله تشوفى وشه دايما صافى ومنور
ربنا يباركلك فى مامتك واخوكى يارب ياجميله
وماتزعليش مسيرنا كلنا نروح عنده
ربنا يرحمه يارب يا حبيبتى
ويدخله الجنه بغير حساب ولا سابقه عذاب
ويصبركم ويعوضك خير يا روح قلبى ان شاء الله
ربنا يرحمه ويصبركم
ازيك يادودو عاملة ايه
الله يتغمده برحمته
ودايما انتى وحمادة تكونوا الولد الصالح
الذى يدعو له
ربنا يسكنه فى جنة نعيم
ويصبر قلبك وينزل على قلبك السكينة لفراقه
ربنا يرحمه
نفس الاحساس بس انا من 3 اشهر بس
الله يرحمة رحمة واسعة من عندة ويسكنه فسيح جناته .
تقبلي مروري
الله يرحمه ويجعلك خير خلف لخير سلف
وبعدين يا بنتي العياط في الرؤية فرج
وادي ربنا فرجها وها أشوفك
يا فرحتي
احلى خبر
كلام جميل وإحساس صادق .. أنا كنت هعيط .................. ربنا يرحمه ويصبرك ومش عارفة أقول إيه تانى
من امبارح بفكر اعلق اقول اية على كلامك
ليقت ان احيانا الصمت في حد ذاتة تعليق بليغ جدا
ربنا يرحمه يارب ويصبرك على فراقه
تحياتى ليكى يا دودو
ربنا يرحمة ويرحم أمواتنا جميعاً
تعيشى وتفتكرى يا دودو
معلش أهو دة حال الدنيا
ربنا يصبركم
الله يرحمه يا رب
ويكرمك على دعائك له وعوض عليكم عوض الصابرين ان شاء الله
ربنا يرحم اموات المسلمين
انتي عارفه كلامك ده بيعمل فيه ايه
ماانتي عارفه الحال من بعضه
بس اعتقد انهم بيكونوا حاسين بينا
سلامي
عزيزتى: لن يموت من يعيش بقلوبنا.. لن يموت.
اولا انا اسف انى بعلق متأخر بس والله أول مره ليه أزور مدونتك بس بجدد ليه الشرف
ثانيا الله يرحمه وتعيشى دايما فكراه أنتى بجد انيانه مخلصه جدا وربنا يديم عليكى الصحه
وربنا يحرم والدك ويدخله الفردوس الأعلى ومعه أمواتنا وأموات المسلمين,,
وياريت تقبلينى صديق لمدونتك,,,
تقديرى وأحترامى لكى
محمد التركى
إرسال تعليق