اللى عنده دم احسن من اللى عنده فلوس

طول عمرى اقول ان اللى عنده دم احسن من اللى عنده فلوس
وهقولكم السبب اللى اكد صحه كلامى
سمعت عن السرقه اللى دايره اليومين دول فى البلوجر والناس اللى بتسرق افكار المدونين
وتنسبها لنفسهم
والمدونين اللى اتسرقوا وكان اولهم احساس طفله محبه للرومانسيه و طفله مش عايزه تكبر(ليدى)
لا السرقه مش للاطفال بس ده معانا كمان على قائمه المسروقين منوش صاحبه مدونه مخنوقه

والله انا اللى قربت اتخنق
واحمد اسير الجراح وورده واحمد مدونه اسماء واحلام فى وجدانى وفراشه وسالى مدونه حاجات جوايا
وده على سبيل المثال يعنى مش حصر اكيد فى ناس كتير مش حاسه انهم بيتسرقوا
ومنهم اختكم اه انا اتسرقت عااااااااااااا
وده رابط الموضوع بتاعى على مدونتى
وده الرابط بتاع الموضوع على المنتدى
ده حتى اللى نقله ماتعبش نفسه انه يغير الصوره
يالهووووى نقل مسطره
و شعر بتاعى فى نفس المنتدى
اللى كاتباه اخدت الصوره بتاعه مدونتى التانيه وقالت انى كاتبه عليه انه منقول
ده كلاااااااااااااامى منقول ازاى ايه الحووول ده؟
الشعر هتلاقوه على جنب عندى باسم حلم

من ضمن مشاركات نفس العضو او العضوه دى
بجد والله احساس فظييييع انك تحس انك اتسرقت

لو محفظتك اتسرقت عااادى
لو حرامى دخل بيتك واخد الكمبيوتر ولا اللاب توب بتاعك عااااادى
لو الفنله بتاعة حضرتك اتسرقت فى المترو برضه عادى
لكن يجى واحد ويسرق دماغك وافكارك
اهو ده اللى مش ممكن ابداااااااااا
لا مش هاغنى
بس انا باحاول اخد الامور ببساطه لانى من الصبح ضغطى عالى
انا ما فكرتش ادور على حاجاتى على النت بس لما الموضوع انتشر قوى كده
قلت يعنى هى جت عليا وانا احسن من الناس دى ؟
اكيد اتسرقت ونايمه على ودانى وعملت بحث عن كلامى
ولقيت موضوعين ليا مسروقين وده برضه على سبيل المثال
وما خفى كان افظع (على رأى ليدى )
ماحاولتش ادور تانى علشان ما اتقهرش اكتر من كده
فعلا انا مش عارفه اعمل ايه
اصل الانسان شويه دم ودى ناس معندهاش دم
واللى مش بيحس لوحده مش هينفع حد يحسسه
انا كنت قافله المدونه اصلا ومش هاكتب تانى بس لقيت انه مش حل
لو انا مش هاتسرق هيتسرق غيرى وغيرى
طيب نعملوا ايه
نجيبوا ضلف كل المدونات بقى ولا ايه؟
ما اقدرش اكتب مواضيع عامه بس
لانى كل احااسيسى باجسدها فى الشعر ولانها هوايه كمان
عايزه اعترف انى ما كنتش حاسه قوى باثر الموضوع على نفوسكم
لكن بعد ما بقيت زيكم حسيت بالالم والمرار قوى

مش هاشتم ولا هاقول تيييييت لانى لو قلت هاقول كلام خااارج خاصه انى متعصبه
اللى اقدر اعمله بمنتهى العجز
انى اقول حسبى الله ونعم الوكيل
وحقى هاخده يوم القيامه ياغجر

ماانا رايحه فاضيه يعنى هادخل الجنه على حسكم

.