عايز تعيش فى زمن الذئاب اسمع النصايح دى ونفذها
1- كن انانى واجعل مصلحتك اولا وقبل كل شئ وفوق كل اعتبار والغايه تبرر الوسيله
2- اكذب وغش وهيقولوا عليك فهلوى وشاطر
3- اشطب من قاموس حياتك كلمه صداقه واستعملها كساتر لمصالحك الشخصيه
4- زيف احساسك ونافق كل من تقابل فى الحياه وكلها مصالح
5- القى قلبك فى اقرب سله مهملات تقابلك
6- اقتل ضميرك او اعطى له مخدر قوى
7- الوفاء اصبح عمله قديمه لاتتبادل فى الاسواق فاسرع باستبدال رصيدك منه الى الغدر والخيانه
8- لا تستخدم لفظ طيب فى كلامك ولكن تعمد ان تجرح وتهين كل من احبك
9- كن دائما فى وضع الهجوم ولا تعطى من امامك فرصه للدفاع عن نفسه
10- تجاهل مشاعر المحيطين بك ولا تعطى لحبهم اى اهتمام

**اذا قدرت تنفذ الكلام اللى فوق ده ابقى قولى ازاى يمكن اقدر انا كمان اعيش فى زمن الذئاب ده

النهارده ياجماعه هنحتفل بانسانه عظيمه بكل معنى الكلمه
بجد انسانه هايله وتستحق كل الخير لانها عمرها مااتمنت لاى انسان غير الخير
انسانه بكل ما تحمله الكلمه من معنى
شايفه كل الناس ملايكه لانها ملاك
تلاقى فيها طيبه ناس زمااااااان اللى راحوا دول واللى باقى منهم قليلين جداااااااا
تلاقى فيها ام حنونه قوووووى
وست مصريه جدعه

وعقليه مثقفه جدا جدااااا
وانسانه بتعترف بالجميل مهما كان قليل
لانها من معدن اصيل
(:
وقد تقرر الاتى
ان يذاع فى ارجاء مملكه التدوين هذا الخبر الجميل
ايها المدونين والمدونات والقارئين والقارئات
رجال وسيدات شباب وانسات
صدرت اليوم بعض الفرمانات
بان هذا اليوم اجمل مامضى وماهو ات
فاليوم عيد ميلاد ارق السيدات محاسن صابر الشربات
وقررت انا دودو هانم ان اصرف لكم بعض العلاوات
وهى ليست ماديات وانما هى منحه مجانيه من الاجازات
دون اى منغصات او كدر او اهات اجازه من بعض المشكلات
ومع المنحه بعض الشيكولاتات والتورتات والحلويات

معلش بقى يامحاسن مالحقتش اكلف الحفله فجبت لك بوفيه تورتات نقى اللى يعجبك

ودى هديه متواضعه منى

اسفه يامحاسن لان البوست ده متاخر 24 ساعه

بوسه كبيره ليكى ياقمر

يلابقى قولوا لمحاسن كل سنه وانتى طيبه ياام بيرو قدامى على هناك
باب مدونتها من هنا

قمت من النوم النهارده نفسى مفتوحه للتهييس
اصلى والله مجنونه وبحالات ياجماعه
ونفسى اقول طظ كبيييييره قوى
طظ لاى حد ضايقنى .. طظ للدنيا كلها
طظ فيكى وانتى عارفه نفسك طبعا لانك ماكونتيش الصاحبه اللى باتمناها

رغم انك مش هتشوفى الكلام ده
طظ فيك انت كمان لانك بعت قلبى رخيص قوى
طظ فى اى حد يفهمنى غلط ومش هاضيع عمرى كله ابرر تصرفاتى وافهم الناس انا مين

طظ فى اللى عايز يبعد عنى ومش بيهتم بمشاعرى
طظ فى اللى عدى ومش هافكر فيه ومش هافكر فى اللى جاى كمان
هاسيبها على ربنا

هو انا مبسوطه ليه ياترى النهارده؟
ليه يادودو ليه يادودو
مش عارفه بس لما حسيت ان النفسيه اتعدلت قلت اقولكم
وكمان دخلت المدونه لقيت احمد اسماء واحلام فى وجدانى منزل بوست تهييس عجب
هههههههههههههههه
فعجبنى كلامه قوى

هتلاقوه هنا
وقلت اهيس انا كمان
انا اجازه وقلت لناس هما عارفين نفسهم طبعا
انى ناويه على حاجات كتير النهارده ومنها انى انزل اشترى لبس للصيف
وازور اصحابى وجدول اعمالى مليان
والبركه فيهم اليوم انضرب
وكل شئ باااظ والاسباب هبقى اقولها لهم على جنب
بس برضه مبسوطه على الاقل اشوف مدونتى اللى هجرتها دى واشوفكم انتم كمان
باشكركم كلكم لانكم حاسيين بيا وبتشاركونى المى وفرحى وصابرين عليا
مفيش مشاعر سلبيه النهارده ياجماعه الحمد لله
ادعولى تدوم الحاله دى بقى
سلاموز

غريب غريب ياقلبى
متغرب بين حبايبى
وصوتى مجروح واخبى
نفسى يادنيا الاقى حبى
نفسى اداوى جرح لقلبى
نفسى يادنيا اعيش واتهنى
نفسى اخلى حياتى دى جنه
نفسى اشيل من قلبى اهاته
نفسى كلامى يهز سكاته
ليه الحب تملى عذاب؟
ليه الصدق امل كداب؟
ليه الفرح عنى يغيب؟
وانصدم فى كل حبيب؟
ليه بنجرح؟ ليه بنخون؟
ليه الحب علينا يهون؟

كان فى يوم بنوته شقيه
عايشه حياتها ومستنيه
فارس احلامها الورديه
احلام مشروعه وعاديه
كانت عايزه تقرب ليه
تفتح قلبها يسكن فيه
ويعيشوا سوى عيشه هنيه
كان جواها كتير حنيه
كان لحياتها الهوى والميه
كانت عن جرح الهوى تسمع
ياما قولتلها الجرح بيوجع
مدتش كلامى اهميه
حبت دابت شوق وهيام
عاشت غرقت فى الاحلام
فاقت فجأه لقيته كلام
والاحلام دابت فى الميه
ضاعت احلامها الورديه
جالها فارس تانى همُام
عمره ماكان يوم حبه كلام
بيحبها والاخلاص نيه
لكن خايفه تصدق تانى
توهب قلبها يبقى انانى
وجراحها المره دى قويه

.

حبايبنا الحلوين اللى دايما منورين

وبالتهانى مسبقين وبالهدايا علينا داخلين
واحنا مستنيين والبالونات ونفخين والتورتات مجهزين
عندنا النهارده عيد ميلاد ياحلوين عارفين عيد ميلاد مين؟

فاتيما قمر التدوين

تصفيق حاااااد

شكرا شكراااااا

محدش عاقل يقدر يكرهها طبعاااااا

البالونات دى انا اللى نفختها لوحدى يافاتيما الناس دى جايين على الجاهز

النهارده فيه اوبن بوفيه واكل كتير واصناف انما ايييييه واللى بيعمل رجيم الله يعوض عليه

التورتات كتير بس دى تورته يوسف روح قلبى اوعوا حد يجى جنبها

والتورتايه النونو دى بتاعتى انا

والشيكولاته دى كلها لفاتيما

الحلويات الشرقيه كمان موجوده

مين عايز يشرب حاجه ساقعه ياجماعه اتفضلوا اتفضلوا زى مدونتكم

اللى مش بيحب الساقع عندنا الطبيعى اهو محدش يتكسف مدوا ايديكو

واللى مالوش فى الحلويات يقدر يتعشى قبل ما يروح كله موجود

تعالى ياطمطم افرجك الهدايا بتاعتى

الورد للورد

والقطط دى كمان علشانك

ولسسسسسه ده فى عربيه نقل جايه ورايا (:

اييييه ده؟

اغيب شويه الاقيكم عاملين كده
طييييب اغسلوا الاطباق بقى ونضفوا المدونه
وانا هاروح اكتب كلمتين حلوين لفاتيما

لو خيرونى
لو خيرونى بين النجوم لأخترت عينكى
لو خيرونى بين الأنهار لأخترت شفتكى
لو خيرونى بين الأزهار لأخترت خدكى
لو خيرونى بين الكواكب لأخترت كفكى
لو خيرونى بين الاقمار لأخترت وجهكى
لو خيرونى بين الليالى لأخترت شعركى
لو خيرونى بين النساء ما اخترت غيركى
**************************
**********
****
*

كل سنه وانتى حبيبتى وفى قلبى يااجمل فاتيما فى الدنيا

حضن كبيييير وبوسه اكبر

.

كل منا له من الاصدقاء من يستحقون ان نحتفظ بهم الى الابد

وهذه بعض النصائح لتقوبه الصداقه اتمنى ان تنال اعجابكم

حتى تصبح الصداقه بلا شروخ
1- ابحث عن الموضوعات المشتركه وابداء الاهتمام بحياه الصديق
2- لا تجعل الغيره والشك يملأن قلبك فكل منا يتمتع باشياء يحسده عليها الاخرون ولكننا لا نرى سوى مايملكه غيرنا
3- كل منا له موضوعات يجب عدم الخوض فيها او التحدث عنها وهذا شئ يجب ان يُحترم
4- الانصات الجيد لما يقول الصديق والاستعداد الدائم لمساعدته
5- كل صداقه فى حاجه الى فتره راحه وهذه الفترات تجعلنا نشعر باهميه هذه الصداقه

*بوست جديد

ياللى تقول ياجواز

عجبنى وان شاء الله يعجبكم

.

هو ادانى كل عمره
خدت منك انت ايه؟
هو ادانى شوق وحب
وانت شوقى جنيت عليه
هو عاش بحبى يحلم
وانت قلبى لعبت بيه
هو اتمنى منى نظره
وانت خُنت عيونى ليه؟
هو بيحلم بيا دنيا
وانت سرقت حلمى ليه؟
هو شارى وانت بايع
يبقى مين الحق ليه؟

.

انا جيييييييييييييييت
مش قلت لكم انى مجنونه وممكن ارجع بسرعه
مودى تمام التمام
ليه؟
ده سؤال وجيه جداااااااااا
ايمان صاحبتى من ايام الحضانه ياجماعه بتتجوز اه والله
اعرفها من 25سنه مؤبد يعنى (كتير مش كده؟)
اهى هتطلع حسن سير وسلوك وتفارقنى واخلص منها بقى
عقبالى انا كمان

ودى صوره تورته الفرح واللى هيجى جنبها هاقطعه

وطبعا انا صوتى رايح من اللى عملته النهارده

هو انا كل يوم هاجوزها دى حبيبتى عقبال شيكو يااارب

دى التالته بتاعتنا من الحضانه برضه

(حاجه تزهق العيال دى عايشين من زمان قوى)

مبروووووك ياايمى
واحب اقولكم ان كوز المحبه اتخرم طرطش على كمى
كل البنات اتجوزت وانا قاعده جنب امى
(تهييييس عاااادى جداااا)
والبت الشقيه شيمو القمر بعتت لى تاج
اصل انا ناقصه
عموما هانجوبوه ياشااااابه

من ايد مانمسكهاش

وياريت متكرريهاش

(:

من أنت ؟ وما الذى تفعله هنا ؟
انا بنوته اسكندرانيه مصريه باعشق بلدى واصحابى واتمنى اعيش فى سلام
باعمل ايه هنا بفضفض مع ناس حبونى لله وفى الله واستحملونى كتييييييير
إسرائيل تقصف كل جنوب ممكن بحثا عنك ، أى شمال ستقصد؟ .
هاروح الجنوب برضه
لان الاسرائيلى جبان ماشفتهوش وهو فى ايده بندقيه وخايف من حجر
لو قلت له بخ هيموت من الخضه
(دى عيال فرافير )
أنت مكلف بحذف حرف من حروف اللغة العربية .. أيها ستختار ولماذا ؟
اممممممممممم
مشكله السؤال ده
ماانا لو حذفت اى حرف هابقى لدغه
خليهم هما 28 هنعملهم احنا 27 لييييييييييه؟
لو قدر لك أن تدخل السجن فما هي القضية التي تتمنى ان تدخل بها إليه؟
دفاع عن الشرف لانى دمى حامى قووووى
بالمناسبة.. منذ متى اكتشفت نفسك؟
والله هى لسه فى مرحله الاكتشاف
واحيانا كتير باقف امامها مذهوله
على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟
الى حلمى طبعا .. علشان ده حلمى انا واللى نعرفه احسن من اللى مانعرفوش
نحن لا نعيش حياتنا بل نتعلم فيها كيف نعيش ما تعليقك؟
تعلمت أنه في المدرسة نتعلم الدروس ثم نواجه الإمتحانات ، أما في الحياة فإننا نواجه الإمتحانات وبعدها نتعلم الدروس
بجملة واحدة فقط أكتب تعريفاً لكل كلمة من الكلمات التالية:

الوطن
مصر ام الدنيا رغم انف كل الدنيا
الأم
الحنان والطيبه
الليل
الهدوء والسكينه والرومانسيه
الحب
هو الحياه من غيره هنعيش فى غابه
أمريكا
بعوضه واحنا عملناها شبح
المرأة
كل شئ مفيش حاجه لها طعم من غير حواء
الصمت
بيكون ابلغ من الكلام فى اوقات كتيره
الانترنت
سلاح ذو حدين
أخترمنصباً واتخذ قرارا ؟
رئيسه جمهوريه
القرار انى اتقى الله واحاول اكون ولو فى نص عدل عُمر
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
وهل وجود الضوء تغييب للشمس
بالعكس ده ابراز لدورها
لولا وجودها ماكان عنتر وقيس وجميل نطقوا الشعر
أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
لا جريمه ايه؟
مااكونش مطلوبه خالص افضل
هو العمر بعزقه؟
إلى أين تمضي كلمات الحب .. بعد أن نقولها؟
الى قلوب وعقول من نحبهم
هل تجد علاقة بشكل أو بآخر بين المرأة وقطاع الطرق ؟
قاطع الطريق يصُر على اخذ مالك او عمرك والمرأه تصُر على اخذ الاتنين معا

(انا ماقلتش حاجه هسسسسسس)
هذا فراق بيني وبينك .. متى ولمن تقولها ؟
لما اكتشف انى اتخدعت
لمن لاى حد بيكذب عليا لانى باكرهه الكذب والكذابين
كيف هو غداً ؟
فى علم الله
واتمنى يكون افضل من النهارده
امرر التاج الى
سالى حاجات جوايا
ايسافو
ايوشه
احساس طفله محبه للرومانسيه
لجين ابو الدهب بنت منطقتى
مونى الشريف
واى حد من دول مر عليه التاج ده قبل كده يبقى ربنا رحمه من ايدى

واللى يحب ياخده معنديش مانع

ناس غاويه وجع قلب اعمل ايه

اييييه الرغى ده كله صداااع انا عارفه

بس مدونتى بقى وانا حره فيها

واللى يحبنا مايضربش نار

انا رجعت اكتب تانى لان المدونه دى زى ما شافت حزنى شافت فرحى برضه
ولأنى فرحانه جدااا كان لازم اشكر اللى كان سبب فى فرحتى لانه يستحق الشكر
وعندى كذا رساله لازم يتبعتوا لاصحابهم
وبرضه من خلال مدونتى دى

اول رساله لباباالله يرحمه
حبيبى طبعا انت عارف انك وحشتنى جدااااا
صح؟ فيه خبر حلو قوى علشانك
منذر عمل لك عمره وصلك ثوابها؟ مبسوط بيها؟
طيب ياحبيبى ربنا يخفف عنك ويرحمك يارب
نعم؟ انا ببكى ليه؟ لانى فرحانه قوى علشانك
حاسه انى كنت سبب فى شئ كويس ليك
تعالى بقى فى المنام وقولى
عايزه اشوفك وحشتنى قوى

الرساله التانيه لمنذر
ربنا يجازيك عنى وعن كل الناس دى خير
ويجعلها فى ميزان حسناتك
لازم اشكرك لان من لم يشكر الناس لا يشكر الله
ولو ان جميلك ده عمرى مااقدر اعبر عنه بكلمه شكر
ربنا يسعد قلبك زى مااسعدتنى والخبر الحلو ده جانى فى وقته
الف الف شكر يامنذر

الرساله التالته لفاتيما
انتى اخت بجد اللى مش من امى وابويا
انتى افضل من اى حد فى الدنيا
انتى انسانه قوى وبتفهمى فى الناس قوى
وبتعرفى تحسى بيا قوى وتلمسى وجعى من غير مااتكلم
ربنا يريح قلبك ويقر عينك بابنك يااااارب

الرساله السادسه لستيته حسب الله

انتى انسانه قلبك كبير وعقلك اكبر

ربنا ما يحرمنى ابدا من نصايحك الغاليه

ويخليكى ليا يااااااااارب

الرساله الرابعه للبحر
وحشتنى وعندى كلام كتير ليك

الرساله الخامسه لدودو عاشقه الرومانسيه
سبحان مغير الاحوال ربك رحمان قوى ورحيم قوى وكريم قوى قوى
اوعى تتغيرى حتى لو كل الناس قالت انك غلط
ربنا مش هيسيبك ابدا بس انتى ارجعيله تانى بشكل افضل من كده

الرساله الاخيره لكل المدونين
انا لسه فى فتره غياب لحد مااستعيد نفسى بشكل يرضينى
اوعوا تنسونى
ولو مت ادعولى من قلبكم
بحبكم جدا واجمل ايام عمرى معاكم بجد

.

ياجماعه سامحونى انى مش قادره اتواصل معاكم بشكل كبير
لكن فيه ظروف عندى ونفسيتى مش متظبطه خالص والله
فكرت اقفل المدونه لان حتى التعليقات اصبحت بارد عليها بالعافيه
لكن فى ناس منكم كتير قالوا لى انهم بيحسوا براحه نفسيه فى مدونتى
علشانهم انا مش هقفلها بس هاخد اجازه
اجازه من مدونتى بس وهاتواصل معاكم ومش هاقدر اسيبكم طبعا
وهارد على بوستاتكم
لكن عايزاكم تلتمسوا لى الاعذار لو غبت او قصرت
لانى فعلا مقصره فى حقكم كوووولكم
انا عارفه ده كويس بس احنا اسره واحده وبنحس ببعض
ثم انى مجنونه ممكن كمان شويه انزل لكم بوست
مين عارف بس ياريت مرحله الفتور دى تعدى
اه انا حاسه بفتور فى كل حاجه مش مدونتى بس
ماليش رغبه فى اى شئ
سامحونى
البوست اللى فات كان غلوشه على نفسى علشان مش اكتب حاجه كئيبه
حاسه انكم تعبتوا من حزنى
بس هارد على تعليقاته
لان الرد على التعليقات لا يقل اهميه عندى من التعليق نفسه
بحبكم كلكم يااجمل اخوات فى الكون كله
دعواتكم

.