ازاى نسامح بعض

البنت المشمشيه طرحت سؤال مهم جدا(حلوه طرحت دى)واحب اننا نتكلم عنه وهو
ازاى نسامح بعض؟

فعلا ياجماعه هو احنا ليه مش بقينا بنعرف نسامح بعض
ليه كل واحد فينا شايف نفسه هو الصح وكل الباقيين غلط
ليه بقينا بنرفض حتى مجرد كلمه نصح
ليه بقى فينا انانيه زياده
طيب هيحصل ايه لو كل واحد عرف انه غلطان وراح للى زعلان منه واستسمحه
ده ممكن يكون اولاد مقاطعين ابوهم وامهم سنييييين
وممكن يكون ناس قاطعه صله ارحامهم سنين كتير جدا بسبب مشاكل الكبار مع بعض
بسبب ميراث او غيره انتم ناسيين ان المُلك لله ومفيش حد فى الاخره هيتباهى باملاكه
لكن كل واحد هيتحاسب على عمله

ولو انت وجارك متخاصمين ليه مش تصالحه ده الجار اقرب من الاهل فى الشده

غير ان الرسول وصى عليه كتييييييييييير جداااااااا
وحتى لو صديق وبعدت عنه بسبب زعل ليه مش تكون انت البادئ بالخير وتسامحه
وخيرهم من يبدأ بالسلام
ليه مش عايز تكون خيرهم
طيب احنا جاى لنا ضيف جميل بيجمعنا كل سنه

على الاقل نعمل له خاطر ونسمع كلامه ونسامح بعض
طبعا عرفتوه
ايييييييييييييييييوه هو شهر رمضان ربنا يعيده علينا بالخير دايما يارب
ليه مش نستغلها فرصه ونرفع سماعه التليفون ونتصل باهلنا
لو بعيد عننا او نروح لحد عندهم لو نقدر ونقول كل سنه وانتم طيبين
كل سنه واحنا متسامحين
بس طبعا مش هنستنى لشهر رمضان احنا لازم نستعد من دلوقتى
صدقونى احنا ناس جوانا خير فوق اى وصف وقلوبنا بيضاء جدااااااااا
وفيها كميه تسامح رهييييييييييييييييييبه
دلوقتى حالا اى حد مزعل اى شخص منه يتصل بيه ويستسمحه
اى ابن سمع لوسوسة شيطانه وزعل ابوه او امه لازم يراضيهم علشان ربنا يرضى عليه
لازم يعرف انهم سبب وجوده فى الدنيا وهيكونوا سبب دخوله الجنه ان شاء الله
اى اب او ام مزعلين اولادهم وبيفرقوا بينهم يصالحوهم لان الرسول عمره ما فرق بين اولاده فى المعامله
اوعى تقول لأ ده عمل وعمل معايا
اوعى تقول كرامتى تمنعنى لان اللى هيردد جواك الكلام ده هو شيطانك
اهزمه وخليك اقوى
اخلص النيه دايما لربنا علشان يجازيك بيها خير
طيب كل الكلام ده لو انت مزعل حد منك وعرفنا هتعمل ايه
طيب لو انت زعلان من حد هتعمل ايه؟
هتسامحه وبرضه هتخلص النيه لربنا
ده الرسول بشر واحد بدخول الجنه بس لانه كان بينام مفيش فى قلبه حقد ولا غل لحد
هو رضا ربك مايستحقش منك انك تسامح فى حقك؟
هى الجنه قليل عليها انك تتعامل مع الناس بقلب صافى؟

انا عارفه انكم هتتصرفوا صح لأنكم فى النهايه عايزين رضا ربنا

على الهامش
فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي !!!