اجمل فرحه فى عمرى الليله

الواد ده شبه عمر قوى سبحان الله

البوست ده هينقسم نصين النص الاول باشكر فيه كل حد سئل عنى خلال اليومين اللى فاتوا
والنص التانى هابشركم بخبر حلو وان كان متأخر كاام ساعه
اما عنى انا .. فعمليه اللوز سهله فعلا بس لما تكون لواحده زيى بلغت من العمر عدد وقدره (يعنى انا عايشه من زمان) بتكون فعلا صعبه... انا لسه تعبانه للاسف بس والله فرحتى بعمر النهارده خلت صوتى طلع ونستنى اى الم
وده يخلينى اجى للبشاره حنين القلب صديقتى الانتيخ جابت لى عمر باشا النهارده ابن قلبى ياناااس فرحتى بيه لا توصف ولما مسكت ايده الصغننه الجميله واتعلق بصوباعى كنت هاموت من الفرحه ومسكت دموعى بالعافيه
من الصبح وانا شغاله سنترال محترك تليفونى وتليفون حنين مش بطلوا رن وانا باتكلم بالعافيه اصلاااا
واللى مش فاكر عمر يدوس هنا وهو يعرف ان اول بشاره بيه كانت من عندى برضه
انا فرحاااانه والدنيا صغيره عليا قوى النهارده
كلامى مش مترتب ومتلخبطه من ساعه ما شفت الواد الشقاوه ده وهو بيصرخ علشان بلبوص ياعينى واتفرجت عليه وهو بياخد الشاور التمام بتاعه واتفرجت عليه وهو بيرضع وكنت حالفه ان اول ايد تشيله قبل ابوه وامه انااااا والحمد لله حصل
وكنت ناويه ازرغد والله اول ما حنين تطلع من العمليات بس ظروفك كده يااستاذ عمر صوتى رايح .. خالتك مريضه ياولدى
بس باذن الله هاعوضهالك فى السبوع وهازرغد وارقص براااااحتى واكون خفيت وافتريت تانى نياهاهاهاهاهاااااااااا
كل حد اتصل بيا او بحنين جميله فى عيونى وكل حد بعت رساله يسئل عننا باشكره الف شكر وكل حد ساب تعليق عندى او عند حنين او عند فاتيما فى نشره الاخبار انا مديونه له بسعادتى
اما فاتيما وكيارا بقى فالكلام عنهم مش هيخلص انا بجد بحبكم قوووووووى
فاتيما .. تعبتك قوى ياقلبى اليومين اللى فاتوا كل كام ساعه تليفون واهتمام مش غريب ابدا على قلب زيك .. النهارده كمان مش حسيت انى لوحدى مع حنين لانك كنتى موجوده جنبى ساعه بساعه وكيارا ياعينى اتصلت كتير برضه وانا وصلت البوسه ياكيكى لعمر وامانتك وصلت يافاتيما بوسه على جبينه وقلت له دى من خالتك فاتيما وبتقولك نورت الدنيا ياواد وليكى عندى مفاجئه حلوه يابطتى
ستيته واهتمامها برضه فعلا فوق الوصف ربنا ما يحرمنى من حبك ليا يادكتوره ابدااااااااااا
علا صيدلانيه كنتى عارفه ان العمليه فى الكُبار بتتعب ومش قلتى لى عاااااااا ادينى شفت بعينى محدش قالى .. شكرا ليكى ياقمر على سؤالك
بابا هانى مصرى جدا انا بحب حضرتك قوى وباشكرك على اهتمامك بيا وسؤالك عنى
خالد همس الاحباب ابو الشهامه والجدعنه ومش بيفوته واجب واتصل يطمئن على حنين برضه
ريم رسائل بلا بريد الرقه كلها ملاك فى صوره انسانه والله
ساره حبيبتى اللى اتصلت من السعوديه بيا اكتر من مره تطمئن عليا باشكرك جدا ياتوأم الروح
المجهول اللى بعت لى رساله شكرا ليك ولو انى كنت احب اعرف انت مين .. فضول مش اكتر (:
احمد اسماء واحلام فى وجدانى انت حد طيب قوى ربنا يديم المعروف بينا
شيما المشكومه ((: قريت تعليقك عند فاتيما ياقلبى وشكرا على سؤالك
عارفه انى ناسيه اسماء كتير جداااااااااا بس سامحونى لانى مهيسه على الاخر
هاروح اشوف مدوناتكم لانكم وحشتونى بجد بس لو مش قدرت سامحونى بقى المهم ان النيه موجوده (: